ИЗЬВА, ИЗЬВА

Вӧльнӧй гыыд йӧктӧ вальс:
Визувлуныд эм на.
Изьва, Изьва, изъя ва,
Донаӧй тэ менам.

Асшӧр шыяс водзӧ ну.
Шыльӧд коськъяс. Кӧть и 
Уна свет вылас эм ю,
Да ӧд тэ дзик ӧти.

Кыдзи муслун, кыдзи мам — 
Ӧти, да и ставыс.
Тэнӧ радейтӧм оз ям,
Ме ог шогсьы таысь.

Ӧтиторйысь пола век — 
Ачыд мед он ям тэ.
Яман — воштан мичтӧ сэк,
Воштан збодер сямтӧ.

Казявлін ӧд? Тэ кӧ тыр,
Шпыннялӧ веж вӧртас.
Тэӧн нимкодясигтыр,
Дзоридзалӧ сьӧртыс.

Морттӧг тэ эн овлы, эн.
Мортлы ӧд тэ колан.
Мед жӧ гажтӧм лолас тэн,
Дыр кӧ ме ог волы.