УДОРАСА КОМИ АНЬ


Удораса коми ань
Ылӧдз на и нималӧ,
Сійӧ абу лябанянь,
Быдӧн дорӧ сибалӧ.

Коми аньыд дыр оз узь,
Вирд моз быттьӧ вирдалӧ.
Керкаас тай тшын ни бус,
Гӧгӧр ставыс дзирдалӧ.

Удораса  абу дыш,
Лунтыръясӧн ноксьӧ на,
Кӧть и шойччӧдлывлас мыш,
Веськӧдлас ки-коксӧ на.

Коми аньыд весь оз ов,
Гортув уджсӧ бергӧдӧ,
Сылӧн тырмӧн нянь и сов,
Став котырнас веськӧдлӧ.

Челядь вӧсна тӧжд быд лун,
Ныв-пияныс — школаын,
Ньӧти удж сылӧн оз вун,
Став могыс ӧд колана.

Клубыд мунӧ кыпыд гаж,
Аньыд ловтӧ кыпӧдӧ,
Сьылӧ сьылан выль и важ,
Мукӧдъяссӧ ышӧдӧ.

Верӧс вӧсна абу шог,
Мортыс бура уджалӧ,
Сьӧмтӧ вайны — сылӧн мог,
Он пыр тужа-нужаӧ.

Удораса коми ань —
Тэрыб, сюсь и мывкыда,
Мича, авъя да и шань,
Олӧ бура, лышкыда.