* * *

Тайӧ сьылансӧ сьывлі ме тэныд.
Тайӧ сьылансӧ сии ме тэныд.
Сӧмын сьыланӧс менсьым эн тӧд.
Сідзкӧ сьӧлӧмад мусмӧма мӧд.

Тайӧ дӧрӧмсӧ вури ме тэныд,
Медым новлігад тэд вӧлі шоныд,
Сӧмын козинӧй тэныд эз ков,
Дзикӧдз нормыліс менам ӧд лов.

Сэсся кыи ме тэд бур джодждӧра,
Зэв и небыдик, мичаник сера,
Менам уджлы кӧть сетін-ӧ дон…
Сӧмын он видзӧд ме вылӧ, он.

Кодзув енэжысь тэныд эг судзӧд,
Ковтӧм муслунысь лов ёна мудзӧ,
Но ӧд зэв бура тӧді и ме,
Кодӧс корсьысин быд лунӧ тэ.

Тэд Саревна-лягуша ӧд колӧ,
Медым мойдын кодь лоас тэд олӧм.
Сӧмын сылы  тэ некыдз эн ков.
Ӧнъя дышкӧд Саревна оз ов.

Век на ӧтнадӧн свет вылас олан,
Да и кодлы тэ татшӧмыс колан…
Тэнад позйыд — шуштӧм и куш,
Век тай бӧрйысин, шудыд эз усь.

Тэныд озыр да мичаник колі,
Важся олӧмыс важӧн нин коли,
Ачыд аслыд тэ лӧсьӧдлін мойд,
Менсьым сьӧлӧмӧс эн мӧй тэ дойд.

Коркӧ сьылансӧ сьылі ме тэныд,
Сійӧс сьӧлӧмсянь сии ме тэныд,
Ӧні сійӧс ме некор ог сьыв,
Тэнӧ кыскӧма джумйӧ ён тыв.