* * *

Мый и виччысьны, мый водзӧ лоас, —
Ассьыд олӧмтӧ водзвыв он тӧд,
Шогыс суас ли, шудыс на воас,
Тайӧс некоді оз висьтав мӧд.

Кӧть и казьтывла томдырся кадӧс,
Сылы ачым жӧ сеті и дон,
Кодыр вӧйтчылан райӧ и адӧ,
Ставсӧ быдӧнлы он висьтав, он.

Вӧвлӧм муслуныд, гажыд и шудыд —
Тайӧ сьӧлӧмысь дзикӧдз оз вун.
Муса мортыд тай — олӧмад кутӧд,
Сійӧ орччӧн ӧд тэкӧд быд лун.

Мый и виччысьны, мый водзӧ лоас, —
Тайӧ миянлы тӧдмавтӧм нӧд.
Сӧмын тӧдан, мый пом коркӧ воас,
Водзвыв шогавны ачым ог мӧд.

Мый нин вӧлі и мый бара лоас, —
Некод тэ пыдди тӧжд-нок оз вен,
Тыр-бур кадыс ӧд, тӧдӧмысь, воас,
Шаньыс бур кылӧн отсалас мен.