* * *

Ӧти тӧв тай кыдзкӧ бара коли:
Узьтӧм войяс, уна пемыд лун,
Ыджыдаліс-ышмаліс кузь тӧлыс,
Сылӧн вынысь некытчӧ он мун.

Кыдзи кыссьӧ тӧвся шуштӧм войыс,
Меысь ӧтдор некоді оз тӧд.
Мый нин вӧлі, мый нин кадыс ваяс?
Гашкӧ, аддза коркӧ мича вӧт.

Лымйыс усьӧ, турӧб пессьӧ-дурӧ,
Нем оз тыдав гӧгӧр пом ни дор,
Кузь войясӧ быдтор воӧ юрӧ:
Шудыс, шогыс, юрсиыд кор дзор.

Турӧбъясӧн, бушколӧн тӧв волӧ,
Пӧрысьыдлӧн войын вошӧ ун:
Муса нылӧй карын кыдзи олӧ?
Мелі внучка некор жӧ оз вун.

Менам нылук, менам бабӧн шуысь —
Наысь дона некод абу мен.
Воасны  на гӧсти ылі муысь,
Отсалас мед налы тшӧтш и Ен.

Тулысын, дерт, аддзыся ме накӧд,
Сӧмын тулыс — меным быттьӧ рай.
Дона тулыс, менӧ бура такӧд,
Уськӧд бара шудсӧ, тӧлысь — май.

Ӧти тӧв тай лёкӧн-сорӧн коли,
Тулысыслы ме тшӧтш ёна рад,
Скӧрмӧм тӧлыс ышмавны тай воліс,
Тулыс меным — зэв и муса кад.