* * *

Чужаніныд — бать-мамыдлӧн керка,
Сы горулын мыла дзольгысь шор,
Ловтӧ коді кыпӧдлывлӧ коркӧ,
Кодыр кывзан сылысь сьылан гор.

Чужаніныд — мӧдлапӧвса парма,
Дзоридзалысь, паськыд лӧзов видз.
Нимкодясян помся зарни арнас,
Нем он вунӧд сылысь ловъя мич.

Чужаніныд — паськыд тыяс, эрдъяс,
Лӧня дзольгысь вӧрса пемыд ёль.
Чужаніныд быдӧнӧс ӧд вердас,
Некодӧс ӧд отсӧгтӧг оз коль.

Чужаніныд — кыдз пу — еджыд розъя,
Тулысъясын радлам сылы ми,
Чужаніныд — тайӧ шуда гозъя,
Сьӧлӧмын кор ӧзйӧ муслун би.

Чужаніныд — тайӧ миян йылӧм,
Быдмасны мед наысь уджач йӧз.
Мед жӧ олӧм лоас быд ныв-пилӧн
Югыд енэж кодь жӧ лӧзсьыс лӧз.

Чужанінлӧн мывкыд — унапӧлӧс,
Коркӧ — скӧр, а коркӧ сійӧ — рам.
Сьӧлӧмын век кылӧ парма гӧлӧс.
Чужаніныд — ставлы муса мам.