КОСЛАН СИКТ


Павкнитчӧма мылькъяс вылын
Удораса важся сикт,
Шевкнитчӧма Мозын пӧлӧн
Борднас лэбач моз жӧ дзик.

Миян сиктным зэв и мича,
Ставлы муса оланін.
Сійӧс пелькӧдам и видзам.
Кослан — медся гажаин.

Видзӧдӧ сикт Мозын вылӧ.
Юыс — нач нин рӧмпӧштан.
Сиктлӧн горыс ылӧдз кылӧ,
Кыпыд, нюмыд олӧм тан.

Сикт гӧгӧрын шувгӧ парма:
Козъя вӧр и кыддза рас.
Уна рӧма раскыс арнас —
Тайӧ вунӧдлытӧм пас.

Нималӧ сикт уджач йӧзӧн,
Шань-бур олысь уна эм,
Быдӧн шуда аслас позйын,
Тадзи вӧлі дзик быд нэм.

Тӧдчымӧн нин бурмис олӧм,
Абу тай нин дудан кад.
Гӧсьтъяс, ми ордӧ ті волӧй.
Ми ӧд ставлы лоам рад.

Миян шӧрсикт шусьӧ Кослан,
Быд олысьлы донаин,
Важ олӧмас мӧвпын кослан:
Кослан медся мича ним.