МЕ — ПАРМА НЫВ
Ичӧтсянь век кыскис вӧрӧ, Пармаыд мен — ловъя лов. Веськавлі кор дзик вӧр шӧрӧ, Ньӧти нинӧмысь эг пов. Ичӧтсянь ӧд кыскис вӧрӧ. Сэні быд пу — менам ёрт, Сылысь отсӧг вӧлі кора, Вӧрыс меным — муса горт. Думӧ усьлӧ Мелеш ягыс, Зӧрма вӧрыс нэм оз вун, Мӧдлапӧвса Ыджыд ягыс Синъяс водзын дзик быд лун. Вӧрыс ставӧс вердас-удас, Сетас тшак, и чӧд, и оз… Сэні нэм ме вӧлі шуда, Нач нин сэні аслам поз. Чӧсмӧдлывліс паськыд нюрыс Турипувйӧн дзик быд во, Мырпом — войвывсалӧн юмыс — Вомад быттьӧ оз и во. Ӧтчукӧрӧн вӧлі мунам Вотны сэтӧр, ӧмидз, оз, Но, а зэр кӧ вӧлі суас, Сыысь дзебас пашкыр коз. Коми пармаын ме быдми, Сійӧ сетіс вын и сям, Кӧть и вӧрыс чиніс-лыдмис, Парма — менам ай и мам. Вӧрӧ сьӧлӧм кыскӧ-корӧ. Сӧмын бырис эбӧс-вын, Парма мичыс синмӧс ёрӧ, Сылань муслунысь ог мын. Вӧрыд кыскис менӧ нэмӧс, Ме ӧд ачым — парма ныв, Тані кольӧ менам нэмӧ, Парма — мыла сьыланкыв.

lkejrlkelkrgner klrjnelknfrkl ekjnrjkenfrej

1