РАПОРТ-ОТЧЁТ


Ёртъяс!
Юбилей меным — ыджыд почёт,
Кӧть эськӧ шуся ме Нёбдінса Виттор —
Коми поэт, драматург, композитор,
Сӧмын тай талун ме не сэтшӧм морт:
Оз сюр ни рифма, ни краска, ни бурджык аккорд.
Ӧти-кӧ, нимкодьла ёна волнуйтча,
Мӧд-кӧ, и полыштӧм менам чувствуйтчӧ, —
Кӧть эськӧ абу нин первойысь да,
Мый керан, сэтшӧм ми нервнӧйӧсь да...

––––––––––

Важ нэмын он вӧлі юртӧ зэв лэпты,
Шулісны: «Комиӧн гижны не смей!»
Ӧні со гижи нин куим вит во.
Коймӧдысь пасъяд ті бур юбилей.
Сідзкӧ нӧ, верма ме шуны:
Веськыда удж туйӧд муні;
Сідз кӧ ме верма гордитчыны,
Кужи кӧ олӧмкӧд йитчыны;
Тадзи кӧ ошйысьӧм пасъя —
Збыльсӧ ме ёна зэв дзуга.
Тані, дерт, абу куш аслам
Ӧтнамӧн перйӧм заслуга:
Партия быдтіс да велӧдіс менӧ,
Сылӧн идеяыс пырис юр вемӧ,
Партия — менам бать-мам,
Дас вит во туйдӧдіс уджалан сям.

––––––––––

Шуда кад олам ми, ёртъяс,
Асланым эС-эС-эС-эР-ын!
Олӧмыс шпорӧдӧ-бордъя,
Вежласьӧ выль пӧлӧс серӧн.
Аддзанныд, кыптіс кыдз дас вит во чӧжӧн
Миян тшӧтш коми культура;
Важӧн дзонь нэмъяс эз вермыны чӧжны
Сылысь кӧть ичӧтик турас.
Дас вит во сайын на (ыджыд-ӧ срок?)
Комилӧн литература пӧшти эз вӧвлы;
Ӧні со эм нин дай абу дзик лёк,
Водзӧ пыр бурмӧ да сӧвмӧ, —
Форманас — национальнӧй,
Пытшкӧснас — социалистическӧй.

Огӧ нин мукӧдысь кольччӧ зэв бӧрӧ,
Овмӧсным тшӧтш миян кыптӧ да ёнмӧ:
Коми му регыдъя пӧраӧн пӧрӧ
Социализм нога индустриальнӧй районӧ.
Видзӧдлам сикт вылӧ —
Мый вӧчсьӧ тані?
Вежсис и сылӧн со пытшкыс и баныс.
Быд уджын лӧньлытӧг пуӧ,
Зэв ыджыд вынйӧра ӧд.
Кывлам нин комилысь шуӧм,
Ӧні пӧ мортыд ме мӧд:
Важ руыс весасис, вешйис,
Выль вылӧ мывкыдыс вежсис.
Тайӧ вот ставсӧ, мый вӧчсьӧ,
Кыдзи выль олӧмыс тэчсьӧ,
Стрӧитсьӧ вӧвлытӧм мирыс,
Гижысь мед тӧдмаліс-йирис.
Могыс сӧветскӧй писательлӧн сэтшӧм:
Эз вӧв мед бӧрвылӧ кольччӧм,
Мед сійӧ зырӧдан-водзмӧстчан этшӧн
Восьлаліс олӧмкӧд орччӧн.
Мед вӧлі ӧнія уджӧ
Быд гижӧд сутшӧ.

Гижӧдыс олӧмсӧ водзӧ мед йӧткӧ,
Удж вылӧ ярмыны йӧзӧс мед тшӧктӧ,
Отсалӧ стрӧитны социализм,
Гижан сям вӧлі мед
Социалистическӧй реализм;
Сэки писатель — не толькӧ твореч,
Сэки тшӧтш сійӧ — культурнӧй боеч.

––––––––––

Та бӧрын кывзыштӧй вот
Менсьым отчёт:
Мый жӧ ме уджалі дас вит во чӧжӧн?
Кужи эг колана могъяскӧд йитчыны?
Прӧста кӧ, весьшӧрӧ пӧрасӧ педзи —
Ме вылӧ позьӧ дай колӧ, дерт, видчыны.
Сӧмын отчёт менам тіянлы лоӧ
Медбӧръя вит вося уджалӧм йылысь,
Воддзасьыс дас вося юбилей вылын
Вӧчлі нин ме кызь кӧкъямысӧд воын.
Талунъя лунӧдз стӧч пасйӧмӧн,
Петі ме татшӧм лыдпасъясӧн.
(Цифраяс некыдз оз лэдзны
Рапортӧс кывбурӧн тэчны,
Сы понда водзӧ докладнӧй
Лоӧ дзик кос проза ладӧн).

Уджалі служащӧй кадрын:
Кык во обполитпросветын,
Мӧд кыкӧс коми театрын,
Во сэсся радиокомитетын.
Уджыд, дерт, тыр вӧлі сэтӧн и татӧн,
Эг лыддьысь прӧста сідз штатын.
Удж костын, корсюрӧ, гижыштны зіли,
Вит воӧн со мый ме «тіли»:

А. Прозаӧн гижӧма (газетысь ӧтдор,
куш журналъясысь вӧчӧма ӧтбор):
Пьесаяс да радиокомпозицияяс — 10
Висьтъяс — 3
Очеркъяс — 11
Статьяяс — 8
Став прозаа гижӧдыс . . 32
Б. Муртаса (размера) гижӧдъяс:
Пьесаяс — 1
Комиӧдӧма радио-опера — 1
Ораторияяс — 6
Поэмаяс — 2
Кывбуръяс да сьыланкывъяс — 53
Став муртаса гижӧдыс . . 63

В. Лӧсьӧдӧма музыка (композиция):
Сьыланкывъяслы — 21
Опереттаяслы — 1
Скрипкаӧн да рояльӧн ворсны — 3
Став музыкальнӧй номерыс — 25

15 воӧн менам лӧсьӧдӧма 73 сьыланкыв:
а) аслам музыкаа — 39
б) мукӧд музыка вылӧ — 34

Со мыйӧн ті водзӧ талун ме петі.
Шуны кӧ веськыда, этша ме серти,
Позис, дерт, унджыкӧс —
Гырысьӧс, бурджыкӧс.

Тыдалӧ, сы вылӧ
Абу на судзсьӧма творчество сямӧй,
Абу на тырмӧма гижан «таланӧй».
Гашкӧ, и уджала дыша, —
Таысь вот ставсьыс ме мыжа.

––––––––––

Лоӧ кӧ дзоньвидзалун —
Водзӧ на гижӧмысь бокӧ ог мун,
Выль лист бок талунсянь восьта:
Партия туй визьӧд веськыда мунны,
Ловъя ударнӧй удж пӧвстӧ тшӧтш сунны;
Сэтысь примеръяссӧ мыччыны,
Мунана удж-могкӧд йитчыны,
Ызйӧдны удж вылӧ сьӧлӧм и вем,
Кадын мед вӧлі пыр шыасьны «эм!»
Гижӧдлысь качество вылӧджык лэптыны,
Гижӧдӧн паськыдджык фронтъясӧ петлыны,
Коми театр миян репертуартӧм,
Радио — сідзи жӧ материалтӧм,
Челядьлы лыддянтор абу, —
Та вылӧ видзӧдім слаба,
Та вылын этша ми пукалім, —
Мый верма, кӧсйыся сетны!
Став тӧдчан гижысьсӧ чистӧ
Ордйысьны чуксала.

Ӧнія кадыс ӧд дӧбельки ёсь —
Классъястӧм олӧмӧ вуджам!
Кыдзсюрӧ бумага лякны оз позь,
Колӧ серьёзнӧя кутчысьны уджӧ.
Кыпӧдны ассьыным став гижан вынсӧ
Социализм тэчан удж-могъяс весьтӧ!
Кутам сӧветскӧй писательлысь нимсӧ
Новлыны нимкодя, гордӧя, чесьтӧн!