ТИМАН
(«Чиб ю» поэмаысь дженьдӧдӧмӧн гижӧдтор)


1. Ыджыд, ыджыд Войвыв край.
Паськыд, паськыд Коми му.
Ылын, ылын Тиман сай.
Югыд, югыд Уква ю.


2. Тиманӧй!
Войвывса слудаӧй!
Тӧдан-ӧ,
Кымын пласт судтаӧн
Тэчсьӧмыд тэ?
Верман-ӧ мӧвпыштны
Измӧм юр вемъясӧн:
Кымын сюрс вояса нэмъясӧн
Кыпӧдчин тэ?
Судзсяс-ӧ
Пӧрасӧ муртавны мераяс,
Кымын эпохаяс, эраяс
Нюжвидзан тэ?


3. Тиманӧй, Тиманӧй!
Вой море лиманӧ
Мыджсьӧма тэнад кын кокыд;
Уква ю сёртаслань,
Изьва ю ковтыслань
Ньывквидзӧ асыв-вой бокыд;
Урал из лэччасын,
Эжва ю петасын
Дізьвидзӧ нитшсялӧм юрыд;
Мыш вылыд ватлалӧ,
Гырк пытшкыд зятъялӧ,
Топалӧм сюрсаыд зурыд.
Ордлыяс костсяньыд,
Кыкнанла боксяньыд
Письтӧны сӧдз югыд юяс:
Тэрыба бузгӧны,
Войланьӧ люзьгӧны,
Море мед питшӧгас сюяс.


4. Тиманӧй!
Тундраса гӧраӧй!
Кок помтӧ тэнсьыд быд пӧраӧ
Йи сора гыясӧн
Йирліс Вой море.
Омлялан шыясӧн,
Кынтӧмӧн сорӧн
Пыр тэнӧ зуавліс тӧв,
Киськавліс зэр,
Дойдавліс шер,
Кӧдзыд лёк турӧбыс
	кабравліс кыдзи!
Тэд быттьӧ веськодь,
	— пыр дізьвидзин чӧв.
Тэ дорын, зверысь
	да пӧткаысь кындзи,
Некор на некутшӧм
		олысь эз вӧв.
Нюжвидзлін тадз,
Кулӧм моз нач, —
Быттьӧкӧ некыт эз вись,
Быттьӧкӧ дзоньнад тэ сісь,
Быдлаті кын,
Пӧдӧма вын, —
Дерт,
Смерть!..


5. Тиманӧй!
Ловъя тай вӧлӧмыд!
Нималӧ олӧмыд:
Выль эра воӧма тэныд —
Пуксьӧма ыдждалан нэмыд.
Тэ дінӧ локтісны йӧз:
Видлісны —
Бок пӧлыд пӧсь,
Кывзісны —
Сьӧлӧмыд вӧрӧ,
Бытшкисны морӧсыд шӧрӧ,
Шурскисны топыд яй пырыд, —
Брызьнитіс тэнад сьӧд вирыд,
Вӧлӧмкӧ, сьӧлӧмтӧ тэнсьыд
Абу на курччӧма смерть:
Сюрс вося нэмъяса вемсьыд
Муткыртӧ «укваса» нерп.


6. Укваӧ тюргӧ
дзоляник «шор» —
нимыс Чиб ю;
Чиб юыс юргӧ
зэв гажа гор —
заводскӧй шум;
Быдлаын гыпкӧ
уджалан ӧд;
Енэжӧ кыптӧ
ыджыд тшын — сьӧд;
Сынӧдын жургӧ
вӧвлытӧм шы —
аэроплан;
Антенна сюргӧ,
радио гы
бергалӧ тан;
Пасьтала ӧзйӧ сюрс лыдӧн
яр электрическӧй би;
кашкӧ пӧсь пар;
Со кутшӧм ӧдъясӧн быдмӧ
Уквалӧн медводдза пи —
выль Чиб ю кар!


7. Важ купеч жӧдзис
дзонь кыксё во —
нинӧм эз ло;
Большевик вӧчис
кушинӧ, со,
куш куим во!
Природа венысьӧс мый вермас повзьӧдныс?
Тані ӧд сійӧ неважӧн-а,
Тиманлы сьӧмӧсас кымын розь
розьӧдіс,
Писькӧдіс нерп петан скважина!
Кымын сюр чургӧдіс —
Кыпӧдіс нерп перъян
вышкаяс!
Тундраысь судзӧдіс сьӧд кизьӧр зарни,
Стрӧитӧ сэні промышленнӧй
кар нин!
Став уджыс дивӧ кодь.
Шензяна туйын:
Укваӧс Эжвакӧд
Йитіс ён туйӧн:
Топӧдӧм гумла кодь шыльыд,
Свинеч кодь нюдз,
Видзӧдлан веськыд туй вылӧ —
Синмыд оз судз!
Автомашинаӧн — жур!
Трук ни трак!
Тиманӧс орӧдӧ, уськӧдӧ дрӧжӧ, —
Тайгаті зымгӧма куим во чӧжӧн
Сьӧлӧм вын кыпӧдан тракт!


8. Быдмӧ ыджыд Войвыв край.
Вежсьӧ паськыд Коми му.
Ловзьӧ Тиман гӧра сай.
Кисьмӧ выль том кар — Чиб ю.