МИ ЛОАМ ДАСЬКыланныд ті? Кылам ми, Скӧралӧ морелӧн креж бердын гы, — Сідз эралӧ капитал-мир. Кыланныд ті? Кылам ми, Война ӧружйӧӧн грымӧдчӧм шы, — Тадз лӧсьӧдчӧ вир юан пир. Тӧданныд ті? Тӧдам ми, Капитал-гундырӧс джагӧдӧ кризис, — Луннас оз инась ни, войнас оз узь. Тӧдам ми, Сійӧ оз пукты ӧружйӧсӧ кисьыс, Кытчӧдз оз чермун да лолыс оз кус. Кывзылӧй ті! Кывзӧй ті, Кывзӧй, став уджалысь йӧз, Мый понда кыпӧдчӧ войналӧн грӧз. Му вывті войналӧн вуджӧр пыр шӧйтӧ, Збыль вылӧ пӧртсьыны гӧтов быд сутш; Сы вылӧ отсасьӧ, ӧгырсӧ пӧльтӧ Лӧж Лига наций фашистъяскӧд тшӧтш. Пон чукӧр пурсьытӧг Оз вермы овны. Оз! Мӧд-мӧдсӧ курччыны Пиньныс пыр ёсь. Капитал мирнӧя Оз вермы овны. Оз! Мӧда-мӧд костаныс Кыссьӧ пыр кось. Ӧти кӧ мӧд вылӧ воӧ — Коймӧдӧс горшлуныс тойлӧ, Сэн сэсся уналӧн пратясьӧм лоӧ, — Мукӧдӧс грабитны быдӧн сэк збоймӧ. Оз ло сэк, Оз ло сэк на костын мир, Лоӧ сэк, Лоӧ сэк мӧд-мӧдӧс сёйӧм, — Лоӧ война! Ыджыд война! Му пасьта письтас сэк вир, визувтас шоръясӧн. Лоӧ война! Ыджыд война! Му сярыс ружтыштас дойӧн, Шебрассяс шойясӧн... Видзӧдлӧй: му пасьта, гӧгӧр Ыръялӧ война би ӧгыр, — Кӧнсюрӧ тшыналӧ тшын, Кӧнсюрӧ гымалӧ гым.Сьылӧм:Саридз сайын, гӧра сайын, Эк, кыптӧ сім сьӧд тшын. Ылӧ кылӧ, вылӧ кайӧ } 2-ысь Ыджыд война гым. Сім сьӧд тшынсӧ, ыджыд гымсӧ, Эк, лэптӧ капитал. Бӧръя пӧра, бӧръя вынсӧ } 2-ысь Пӧдтӧ кризис-вал. Аслас рӧдкӧд, мӧда-мӧдкӧд, Эк, панӧ кось да тыш: Корсьӧ война помысь ӧтльӧк, } 2-ысь Чайтӧ мӧдлысь мыж.Тадзи со му пасьта, гӧгӧр, Ыръялӧ война би ӧгыр, — Кӧнсюрӧ тшыналӧ тшын, Кӧнсюрӧ гымалӧ гым. Капиталистъяслӧн чужӧмныс лӧз, Пытшкӧсныс лёк вирӧн тыр: — «Войнаӧн, Войнаӧн Жугӧдам сквӧзь! Войнатӧг, Войнатӧг Кризис оз быр!» Войнаӧн! Войнаӧн налӧн став олӧмыс пуӧ. Войнаӧн! Войнаӧн олӧмыс — налӧн и пас. А кризис пыр содӧ и содӧ. Код вылӧ медъёна водӧ? Вермытӧм сьӧкыдсӧ нуӧ Сэтчӧс странаясса уджалысь класс: Сійӧ став нуждасӧ кыскӧ, Пӧсьнас и, Вирнас и, Синванас мыськӧ Капиталистъяслысь пежсӧ, Сӧстӧмтӧ муыслысь эжсӧ. Тӧдӧны быдӧн, — Тӧдӧны найӧ. Тӧдам и ми: Матысмӧ, матысмӧ час, Ыпнитас яр революция би, Кыптас став мувывса рабочӧй класс, Чергӧдчас капитал-зверь — Сы вылӧ чуксалӧ Гӧрд Коминтерн.Сьылӧм:Ӧтув йитчӧй, став мувывса пролетаръяс! Гып! Гып! Брун! Брон! Гальс! Гальс! Трун! Трон! Зып! Зып! Бум! Бом! Мыйсяма зык? Мыйсяма шум? Тӧдам ми, Мый тайӧ шум пӧвстас чужӧ: Тадзи со капитал дорӧ ӧружйӧ. Аддзам ми, Кодӧс пыр кыйӧдӧ зверь, Код вылӧ медъёна скӧр, Кодлы сідз лӧсьӧдӧ свинеча шер, — Сійӧ — ЭС-эС-эС-эР. Ыдждаыс — Квайтӧд пай муыслӧн, Пасьтаыс — Мир вӧсна мунысьлӧн, Кытшолыс-гӧгӧрыс Лёк враг оз узь, — Со кутшӧм миян Сӧветскӧй Союз. Ыдждаыс — Синъясӧн орӧдтӧм, Пасьтаыс — Берегтӧм морелӧн, Кытшолыс-гӧгӧрыс — Муртавтӧм кузь, — Со кутшӧм миян Сӧветскӧй Союз. Быдлаын, кытчӧ он видзӧдлы, Лун ни вой ӧдсӧ оз личӧдлы, Чорыда зэвтӧмӧн вынйӧра сой Зымгӧ ударнӧй бригада выль строй.Сьылӧм:Заводъяслӧн пытшкӧсыс Удж шумӧн тыр, Рабочӧйлӧн сьӧлӧмыс Тӧждысьӧ пыр: — Вай, ӧтувтчам, ёртъяс, } 2-ысь Бригадаӧ ми. Ӧд асланым власьт вӧсна Ӧтветын ми! Лёк вир-сера вуджӧръяс Шӧйтӧны пыр, Сӧветскӧй границаӧ Сюйӧны ныр. — Вай, ӧтувтчам, ёртъяс, } 2-ысь Бригадаӧ ми. Ӧд асланым власьт вӧсна Ӧтветын ми!Мир пасьта шензяна ӧдъясӧн СССР стрӧитӧ социализм. Татшӧмсӧ некор на, Весигтӧ вӧтъясӧн, Эз тӧдлы капитализм. Войдӧрсӧ серавліс, Ӧні нин эралӧ Лондон и, Рим и, Париж и, Нью-Йорк; Пыр кодкӧ лӧж лэдзӧ, Пыр кодкӧ грӧзитчӧ, Пыр лоӧ тӧждысьны, Мед эськӧ уджнымӧс некод эз торк. Дасьӧсь-ӧ ми? Дасьӧсь ми дорйысьны пыр, Тӧдлытӧг врагыд оз пыр! Асьным ог панӧ ми кось, Но рӧсплокӧ сійӧ оз босьт: Социализм-олӧм тэчам быд час, А киын винтовка пыр дась.Сьылӧм:Выль мир дорам Личӧдлытӧм ӧдӧн, Содӧ, ёнмӧ миян вын. Быд фашист, Быд генерал мед тӧдӧ: Миян винтовка оз мын. Кось кӧ кыптас — огӧ бӧрддзӧ, Враг оз кый. Эк, винтовка, тэ эн вӧрзьы } Бура лый! Миян сила — Абу на куш ружйӧ, Абу пушка, абу танк, — Му выв врагӧс Жуявтӧдзыс чужйӧ Миян пятилетка-план. Ӧд оз личав, дорам-ковгам, Тӧдам мый. Враг кӧ сюйсяс — сэк, винтовка, } Бура лый! Капиталлӧн Векыштчӧма рожа, Лун ни вой сійӧ оз ланьт: Мыйла быдмӧ Социализм чожа, Быд лун ломзьӧ выль гигант. Враг кӧ вӧчас остановка — Тӧдас мый. Эк, эн вӧрзьы тэ, винтовка, } Бура лый! Ми ӧд — Му выв Октябрлӧн бригада, Ленин знамя — мунан пас. Кось кӧ кыптас — Ӧтув миян радӧ Сувтас став рабочӧй класс. Сэк, буржуй, тэ кыдзи пышъян, Кытчӧ, мый? Эк, винтовка, водзсянь, мышсянь } Бура лый!Тӧдлім ми тышкасян кӧр, Некор эг бӧрыньтчӧ бӧр. Лунвывсянь, асывсянь, Рытывсянь, войсянь Миянӧс жмитліс лёк враг. Ыджыд победаӧн Бергӧдчим фронтсянь — Топыда кутім гӧрд флаг. Вайлісны миянлы война, Ӧтвылысь кӧсйисны сёйны Миллер, Деникин, Колчак, Врангель, Юденич, поляк, — Кыптыліс дас нёль держава, Дас нёль держава! Капитал зэлӧдліс сӧн!.. Но миян Гӧрд Армия, Доблестя армия, Петкӧдліс врагъяслы звӧн — Ставнысӧ жугӧдіс скӧнь, Шедӧдіс куслытӧм слава, Мир пасьта нималан слава. Мунліс лёк турӧбӧн Войналӧн биыс Войвывті, Комиӧд тшӧтш. Еджыдлӧн бандаыс Унаӧс виис, Жертваыс — артавтӧм тшӧт. Англия тшӧктӧмӧн Босьтчыліс Латкин Путшкыны вир пратя гез. Куш плеша тшӧкмуніс — Чорыда зятким, Эз вермы мырддьыны мез. Гымалан пӧраыс Кольӧма ылӧ, Олӧмыс пуксьӧма мӧд. Сӧмын ӧд кылам ми, Кылам, Мый вӧчӧ капитал рӧд, Бугыльыс — мырд, Кырымыс — гырд, Сьӧлӧмыс — сьӧд.Сьылӧм:Буржуй оз ланьтлы — лӧсьӧдчӧ Пыр панны выль война, Кӧть война грӧз пыр ӧшӧдчӧ — Оз пов Сӧвет страна. Кор воас час — Ми лоам дась, Рабочӧй класс пыр дась. Эй, пролетарий, вынтӧ дасьт! Ми доръям Сӧвет власть! Ми пӧртам дженьыд пӧраӧн Выль мирлысь быдманін Гранитнӧй чорыд гӧраӧ, Оз мӧрччы враглӧн пинь. Кор воас час — Пыр лоам дась, Рабочӧй класс пыр дась. Эй, пролетарий, вынтӧ дасьт! Ми доръям Сӧвет власть! Пыр повтӧг водзӧ восьлалам, Туй индӧ ВКП. Оз падмӧд враг, ми водзсасям — Оз бара ловйӧн пет! Мед волас гад — Оз разьсьы рад, Зэв топыд миян рад. Эй, пролетарий, вынтӧ дасьт! Ми доръям Сӧвет власть! Буржуй кӧ кыптас войнаӧн, Сэк ставнас ӧзъяс му: Сэк сійӧ лоӧ шойнаӧн* Да аслыс кодъяс гу. Кор воас час — Пыр лоам дась, Тшӧтш став рабочӧй класс. Эй, лэптӧй флагъяс! Воӧ кад — Став мувывса Октябрь. Гып! Гып! Зым! Зым! Мыйсяма шум? Мыйсяма гаж? Зытш! Зытш! Грым! Грым! Гук! Гук! Жнум! Дзуж! Дзаж! Тӧдам ми, Мый тайӧ гаж пӧвстас чужӧ: Тадзи со СССР дорӧ выль мир, Враглы мый медъёна чушӧ, Мыйысь пыр медъёна пуӧ лёк вир, — Зымгысьӧ из вылӧ из, Стрӧитсьӧ социализм. Быд уджӧ босьтчӧм — Днепрострой, Быд гигант воссьӧм — Магнитострой, Удж ӧдным быдлаын Ломалӧ биӧн, Ставсӧ ми стрӧитам Асланым киӧн. Сьӧкыдысь огӧ ми мытшасьӧ, небось! Уджным и олӧмным ленинизм паса. СССР — Вӧрзьӧдны вермытӧм крепость, СССР — Му выв революция-база. Мӧд пятилетка нин воӧ. Мый сэки лоӧ? Пуксяс сэк вӧвлытӧм олӧм, — Класстӧм выль общество, Мый вӧсна вермасям, олам, Воам ми социализм олан кадӧ, Овмӧс да техника ладӧн Сувтам Европаын Медводдза радӧ. Гӧрд кодзув югыда дзирдалӧ, Некор нин сійӧ оз берд. Паськыд победа туй индалӧ Ленинлӧн партия — ВКП(б). Збыльысь кӧ капитал кыпӧдас юр, Сылы сэк лэптысяс медбӧръя штурм. Не толькӧ миян Гӧрд Армия, Не толькӧ миян Гӧрд флот, — Кыптас тшӧтш скӧрмӧмӧн, ярмӧмӧн Быд пролетарий, быд уджалысь морт, — Врагъяслы воча, Шӧрсянь, Водзсянь и бӧрсянь Сувтас гӧрд фронт, Му вывса сё миллиона гӧрд фронт. Здрӧгнитас, потласяс му, Му пасьта кодйысяс гу, Гу пытшкас чергӧдчас капитализм, Гу вылас шлыпкысяс вӧрзьывтӧм из.Сьылӧм:Тайӧ кыпӧдчӧм миян — Му выв медбӧръя кось, Сувт, уджалысь йӧз пиян, Став эмбур аслыд босьт!
