ПОДВИГ, КОДІ ШЫЗЬӦДІС МИРЛёкысь ышмис полярнӧй Вой саридз, Йиа пиньяссӧ жергӧдіс — чаш! Кӧсйис ворсыштны дзор пӧрысь стареч, Большевикъяс мед тӧдлісны гаж. Видзис наянлун сьӧлӧмын, мускын, Йӧктіс, бергаліс, — этшсӧ эз тӧд. Сылы шымыртны сюрис «Челюскин», Сыкӧд ворсіс, но тешыс эз пет: Скӧрысь кажгӧмӧн курччаліс-йирис, Горшас ньылыштіс гӧрд паракод... И «Челюскинӧс» примитіс йирыс, Сылӧн ори медбӧръя аккорд. Дерт, стихиялӧн вынйӧр зэв ыджыд. И природа век петкӧдлӧ грӧз, Но «Челюскинлӧн» вӧлі ён мыджӧд — Большевик дисциплинаа йӧз. Найӧ колины йи вылӧ ловйӧн, Налысь Вой море сьӧлӧм эз жмит, Налӧн олӧмыс гартчис любовӧн, Накӧд вӧлі профессор — ёрт Шмидт. Океан шӧрын довъяліс лагер, Лагер гӧгӧрын — берегтӧм эрд. Колӧ тӧдны геройство, отвага, Кор кык тӧлысь чӧж кыйӧдіс смерть! Юӧр воӧм мысьт, сійӧ жӧ часын Лэбис войвылӧ дас самолёт, Петіс кык океан вомӧн «Красин», — Вӧлі дась быд моряк и пилот! «Мед жӧ мездыны геройясӧс пикысь! Мед жӧ морелы жертва эз сюр!» — Тадз миллёнъяслӧн сьӧлӧмыс тіпкис, Ыджыд эскӧмӧн сиисны бур. Смел пилотъяс геройяслы паныд Шмидт стоянкаӧ вӧчисны слёт. Туйсӧ гӧра ни море эз падмӧд, Эз ло пыкысьӧн кӧдзыд ни лёк. Молоков, Каманин, Доронин, Водопьянов, Ляпидевскӧй, Леваневскӧй, Слепнёв Ёна мырсисны скӧр океанын, Кытчӧдз лагерын эз коль морт лов. Ставсӧ берегӧ вайисны ладӧн; Налӧн славаыс некор оз берд! Кӧлӧ мужество, доблесьт, отвага: Море мыш вылӧ пуксьӧм ӧд — смерть! Тайӧ подвигыс шензьӧдіс мирсӧ, Большевикъяслысь петкӧдліс вын. Враг кӧ миянӧ сюяс пеж нырсӧ, «Эпопеяысь» бурӧн оз мын!
