МАМӦЛЫ


Ачыд тэ пемыд,
Эн тӧдлы нэмыд
	Гижӧдлысь сер.
Медводдза питӧ
Чужтін тэ гидын, —
	Няйтінын, дерт.
Быдтін да вердін,
Ас морӧс бердын
	Тӧкӧдлін пыр.
Сьӧлӧмсянь сиин,
Мед эськӧ пиыд
	Оліс зэв дыр;
Мед эськӧ сылы
Олӧмыс вылӧ
	Шуд сетіс ен.
Ас пемыдлунӧн
Мӧд ногӧн шуны
	Эн вермы, эн...
Судзсьытӧмпырысь
Школаӧ пырны
	Отсалін мем.
Ачыд и нуин,
Меліа шуин:
	«Велӧдчы сэн!»
Кызь вит во сайын
Гортысь ме «вайми» —
	Мый лоан — ло!..
Уна кад ныри —
Меным нин тырис
	Нелямын во.
Олӧмсьыс бурыс
Олігӧн сюрис, —
	Вежсис и сям.
Важ бурсьыс тэнӧ
Казьтыла нэмӧн:
	«Аттьӧ, бур мам!»