ЧЕЛЯДЬДЫРСЯ ПАРАКОД


Паськыд юӧд тутсӧ-катӧ
Юсь кодь еджыд паракод,
Берег дорӧ локтіс матӧ,
Сиктлань воськов вӧчис сод.
А ме сэтчӧ — ичӧт жбырган —
Лэбзи-пукси, ог и пов,
Сьӧлӧм триньгӧ нач нин жыннян,
Таысь бурджыктор оз ков.
Кутшӧм нимыс тайӧ юлӧн?
Кытчӧ ката? Ог на тӧд.
Юыс, вӧлӧм, менам олӧм,
А ме сэні босьті ӧд.
Гӧгӧр йӧзыс пуӧ-жуӧ,
Кодкӧ лэччӧ, кодкӧ кайӧ,
Тані менам став рӧдвужӧй,
Орччӧн мамӧй, орччӧн айӧй,
Коли челядьдыр да школа,
Дженьыд томлунӧй и вӧлі,
Нылӧс быдті, водзӧ ола,
Мый нин меным сэсся колӧ...
Со тай быдмӧ бабӧн шуысь —
Ичӧт тёльган — муса ныв,
Менсьым олӧм водзӧ нуысь,
Сылань нюжӧда ме сыв.
Югыд юас чужлі-быдми,
Вӧлі ставыс: гаж и шог,
Катны водзӧ эг на мудз ме,
Олан туйын уна мог.
Визувинті дыр нин сына,
Ог на, ог на нюж ме вод,
Век на водзлань бруткӧ-сынӧ
Челядьдырся паракод.