МЕДВОДДЗА РАДЕЙТЧӦМ


Кытчӧ кольӧма томдырся олӧмӧй!
Коркӧ вӧвлі-ӧ радейтчан кад!
Коркӧ тӧдліс-ӧ енбиа сьӧлӧмӧй,
Кыдзи вашкӧдчӧ тувсовъя сад!

Быттьӧ тӧрыт на гажӧдчи-сьылі ме,
Вӧлі шудаӧн, шоглун эг тӧд,
Ёна эски сэк ӧтувъя олӧмӧ,
Сӧмын орччӧн тэ водзӧ эн мӧд.

Олан туйӧдыс ӧтнамӧн восьлалі,
Зіли вунӧдны тэнсьыд ме ним,
Сӧмын лун-войсӧ весьшӧрӧ вошталі,
Некыдз сьӧлӧмын дойыс эз чин.

Тӧда, тэкӧдыд коркӧ на аддзысьлам,
Шуны мелі кыв тырмас тэд вын,
Кыкӧн медся бур каднымӧс казьтылам,
Менам сьӧлӧмӧй абу на кын.

Ылӧ кольӧма медводдза радейтчӧм,
Олӧм-вылӧмын вошӧма лад,
Сӧмын тэныд ме муӧдзыс копыртча,
Выльног гыалысь тувсовъя сад.