ЧУЖАН КЫВКӦД СЁРНИ


Коми кывйӧй тэ менам,
Сэтшӧм авъя да мича,
Чужан кывйӧй тэ менам,
Тэтӧг мый эськӧ вӧча...
Тэ ӧд отсалан туйын
Уна сьӧкыдлун венны,
Сетан кыпыдлун меным
Олӧм-вылӧмӧс вуджны.

Кӧсъян, кывбур тэд тэча,
Кӧсъян, сьыланкыв сьыла,
Тэныд став бурсӧ вӧча,
Сӧмын нимав зэв ылӧ.
Сӧмын петкӧдлы асьтӧ,
Кутшӧм кыпыд да мыла,
Ассьыд мичлунтӧ восьты,
Медым сьӧлӧмӧй сьылӧ.

Тӧдлін полӧм да ёрӧм,
Тӧдлін шудаджык лунъяс,
Ме ӧд Енмыслысь кора,
Лёксьыс мед тэнӧ видзас.
Мед жӧ коми кыв выльысь
Вежа сӧдз ваӧн мыссяс,
Мед жӧ коми морт йылысь
Сӧмын бурторйыс кывсяс.

Кыдзи мам дорӧ муслун
Оз ӧд кус да оз чусмы,
Чужан кыв дорӧ муслун
Мед оз вош да оз косьмы.
Кута лача, эм эскӧм,
Ассьыд мог водзӧ нуан,
Ичӧт бикиньсянь ӧзйӧм,
Ыджыд бипурӧн лоан.