ОКТЯБРЬ

Всегда, всегда к Октябрьской годовщине
Я лучшие свои стихи пишу.
М. Исаковский

Октябрь. И бара пасъям годовщина.
И кыпыдлунлы бара абу пом.
Но мыйла думӧй нуӧ Изьва дінӧ?
И казьтыла ме мыйла Катыдпом?

Октябрь. И тан, и сэн бур йӧзлы рад ме,
Ас му вылын кӧть кытчӧ ме ог во,
Кор ӧтув гажкӧд мортлӧн сьӧлӧм ладмӧ,
Сэк ӧтув гажлӧн чинӧмыс оз ло.

Октябрь — со миян чусмывлытӧм кодзув!
Ак, быдӧнлӧн ӧд, ёртъяс, ӧти нэм,
Ас сикас туй дзик быдӧнлӧн — век водзын,
И быдӧнлӧн ас сикас Изьва эм.

Октябрь. Ми сійӧс ыдждӧдлыны кужам.
Ми сыкӧд йитам чужанінлысь мич.
И кыдз нӧ, сідзкӧ, праздникын и уджын
Лӧнь Изьвасӧ тшӧтш сьӧлӧмам ог видз?

Октябрь. Би рӧмыс лӧсялӧ страналы:
Би рӧма флагъяс талун гӧгӧрбок.
И шуд, и дой медбура кылам талун.
Ті вынсьӧданныд кывъясӧс, чой-вок?

Октябрь. Му шарсӧ кытшовтны мен эськӧ,
Быд сьӧлӧмӧ пӧсь радлун пыртны мед!
Великӧй лун! А мен мӧй сійӧ веськодь?
Ме абу мӧй Октябрнымлӧн поэт?

Октябрь. Том сьӧлӧм пессьӧ морӧс пиын, — 
Кыдз быттьӧ шудлӧн лэбач олӧ сэн.
Гӧрд знамя шпоргӧ. Мен и сьывсьӧ сійӧн,
Мый тайӧ знамя улын овны мен.