УСЬӦМ БОЕЦЪЯСЛЫ

Ті ӧд рытывлань чужӧмӧн
Миян шуд вӧсна усид.
Лунъяс мичаӧсь чужӧны,
Водзӧ мичмӧдам мусӧ.

Дона вокъясӧй, ыбъясын
Зарни сю бара воӧ,
Мича керкаяс лыбӧны,
Выль боец сувтӧ стройӧ.

Ставсӧ лов сайысь сетінныд,
Враг кор рабствосӧ вӧзйис.
Честнӧй кось вылӧ петігӧн
Сӧмын ӧтитор кӧсйид:

Медым моресянь мореӧдз
Вӧлі вӧльнӧйӧн муным.
Сідзкӧ, тіянысь торъяӧс
Нинӧм миянлы нуны.

Ставыс ӧтласа, вокъясӧй:
Тувсов праздниклӧн шумыс,
Миян планъяслӧн могъясыс
И поэтлӧн бур думъяс.

Ті ӧд ставсӧ, мый радуйтӧ,
Мыйӧн асьныд ті олід,
Мирнӧй йӧзлы, выль кадъяслы,
Локтысь петаслы колид.

Кывтысь воясыс нуисны
Уна ва ылӧ-ылӧ...
Сьыланкывъяс ас му йылысь
Сьылам важӧс и выльӧс.

Ті пыр эскид, ті тӧдінныд:
Враглы немтор оз вичмы.
Тіян паметьӧн Рӧдина
Талун миянлы видзны.