ТӦРЫТЪЯ СЁРНИ


Пукала гортын ӧтнам. Выль во виччыся. Телевизор оз петкӧдлы. Ньӧбӧмсяньыс, кыдз вайи магазинсьыс, эг на видзӧдлӧй, а тӧрыт колис гарантийнӧй срокыс. Мастерсӧ быдса во виччысим да эз и волы. Нинӧм вӧчӧмысь открыткаяс видлала, кодъяс Выль во кежлӧ воӧмны. Тайӧ со — гӧтырлы кутшӧмкӧ Евлампийсянь. Открытка вылас кык гулюӧс рисуйтӧма, окасьӧны. «Коді нӧ тайӧ Евлампийыс?» — юавлі. «А, — шуӧ, — быдтор эн юась».

А тайӧ со нывкаӧйлы, Юлялы. Кутшӧмкӧ Витюнчиксянь. Быдмис, другӧ, нылыс, эг и казявлы. Витюнчикъяс нин эмӧсь. А со и тьӧщалы эм. Кыдзи нин кырымасьӧма? Викентий Арсентьевич. Прӧсти господи, кулан паськӧм нин лӧсьӧдіс-а. Мыйӧн тӧдан эськӧ да. Гаргӧм на сідзсӧ. Тайӧ меным. Воксянь. Молодеч, абу вунӧдӧма. Ме ӧні сылы нинӧм эг мӧдӧдлы. Кольӧм во ыстылі, тырмас, абу челядь — гажыс оз быр. Но звӧнитлыны позьӧ — гортас телефоныс эм.

Понді бергӧдлыны телефон кытшсӧ. Первойсӧ ӧтарӧ «занят» висьталіс, сэсся омлявны пондыліс. Муніс медбӧрын. Медлы коді босьтас? Босьтіс кодікӧ.

— Алё, алё! Коді нӧ? Семӧ, тэ али? Нинӧм тай оз кыв! Мый? Ог кыв, мися, нинӧм! Менам кылӧ, да? Сідзкӧ, менӧ и кывзы. Выль воӧн тэнӧ чолӧмала, братан! Кыдзи нин олан? Понйыд быдмӧ на? Менам тай куліс, клянича сёйӧма да. Пӧрысьнас вӧрала. Тӧрыт сӧмын на вӧрысь вои, Выль во кежлас лэччи. Тані тырыс выльтор. Важъя невестаыд тай верӧс сайӧ петӧма Педул Вань сайӧ. Эн кывлы али мый? Ӧні нӧ сэсся кытчӧ?.. Но, волігъясад? Мед, эн шогсьы, выльӧс лӧсьӧдан. Миянысь Матвей Саньсӧ тӧдан-ӧ? Но вот, ошкӧс гуысь кыпӧдас. Лыяс, а кытчӧ лыяс? Ошкыс сы вылӧ. Пуртӧн сэсся кырлалас. Зверыс пель пӧвсӧ чашнитӧма. Корсьлас лымсьыс, но оз сюр. Шуӧ, культурнӧя эськӧ вурны на позис. Вирсӧ уна воштӧма, да ӧдва спаситісны. Нӧшта нӧ мый висьтала? Юля бура велӧдчӧ. Вит три сӧмын во джыннас петӧма. Поведенньӧыс тай неуд-а. Но сійӧ меӧ воӧма карактернас — оз быдӧнӧс кывзы. Тьӧщалы кулан паськӧм лӧсьӧдім, зэв уна деньга койыштім. Дзик сӧмын гӧрд плюшыс гортсӧ кышны мый сулалӧ. Сё пакӧсь, оз кӧ на кув. А оз на, тыдалӧ, кӧсйы. Тӧрыт нылыслы шуӧ пывсьыны лэччигӧн, куим вося корӧсьӧн пӧ орслы, ог-ӧ нӧшта олышт.

А гӧтыр йылысь мый верма висьтавны. Кызіс ӧні сійӧ менам — лад абу. Быдӧн кызас клуб ӧдзӧс дорын белет косявлігӧн. Удждоныс ичӧт, а сёйӧ куим ме мында. Бурджык гид тыр порсь видзны. Фермаӧ ыстылі уджавны — оз мун. Ме, шуӧ, культурнӧй работник, абу фермаын уджалысь. Быд пӧрйӧ весиг клубас оз ачыс ветлы, Юляӧс ыстӧ. А сэтчӧ кӧть кодӧс сувтӧд дас мортлысь белетсӧ шамыртны.

А тэнад семьяыд кыдзи олӧ? Гӧтырыд тай, кывлі, ёна висьмылӧма. Бурдіс-ӧ? А мый лоас сылы, ведьмалы. Кӧнкӧ век тэнӧ, коньӧрӧс, йирӧ? Йирӧ, дерт, меным висьтавны оз ков. Вом каличсӧ ӧд эз на вежны. Ачыд мыжа. Сетін вӧля первой лунсяньыс асьтӧ пилитны. Челядьыд ӧні быдмисны нин, алимент налы мынтыны оз ков. Вӧтлы, сідзкӧ, мый видзӧдан ас дорад. Ме кӧ эськӧ...

Но та вылын и ставыс. Нӧштаысь на Выль воӧн тэнӧ, братан. Сэсся тэ ӧні звӧнит. Висьтав, мый кӧсъян, ме кывза.

Пукті трубкасӧ да понді звӧнок виччысьны. Звӧнитіс. Босьті.

— Алё, алё! Тайӧ тэ, да? Кывзан? Но кывзы, кывзы. Пельыд тэнад ӧні ӧтитор-мӧдтор кылас. Тайӧ ӧд ме, коді тай ведьмаыс. Кывзы ӧні, кывзы ӧні, трубкасӧ эн шыбит. Ӧні ме тэнӧ тшын пыр лэдза. Сэтчӧдз ругайта, мый весиг аслад понйыдлы тэнӧ исыштны зывӧк лоӧ. Трубкасӧ, мися, эн пукты...

Трубкасӧ ме эг и пукты, а тупки ки пыдӧснам, мед не кывны. Аслам ньылӧм чепӧсйис. Пуктынысӧ ог лысьт и кывзынысӧ пола. Кылас пуктӧмсӧ да дугдас кӧ — нӧшта на лёк. Ӧні кӧ менӧ пӧттӧдзыс оз пиняв, татчӧ воас. Сэки йӧз серамыд и лоас. Быть слӧймӧдчас йӧз дорын менӧ янӧдны. Со и кута трубкасӧ, ог лысьт пуктыны. Босьтлі ӧтчыд ки пыдӧсӧс, а трубкасьыс: та-та-та-та-та. Пулемётысь быттьӧ. Семьяӧ ёлка вылысь нин воис, а «пулемётыс», кывзылі да, век на лыйлӧ. Тадзи ӧд, думайта, и Выль воыс сэсся кучкас. Мый лоанаыс лоӧ — пукті трубкасӧ... Да пыдісянь лолышті, быттьӧ лэчкысь мыні. Татшӧм сёрни бӧрад Выль вося шампанскӧйыс ӧдвакӧ голя кузяыд кывтас.


Гижӧд
Тӧрытъя сёрни
Жанр: 

lkejrlkelkrgner klrjnelknfrkl ekjnrjkenfrej

1