ВУРД ШАПКА


Семен Федорович быд во ӧти кадӧ босьтӧ отпуск да локтӧ чужан сиктас. Дерт, ыджыд прӧмыс йылысь оз мӧвпав, а шӧйтны ружьеӧн тӧдса вӧръясӧд, пукалыштны вугыр шатинӧн, шойччыштны карса олӧмысь да уджысь — со мый йылысь во чӧж мӧвпаліс Семен Федорович.

А ӧні восьлаліс сійӧ аслас двустволкаӧн ытшкӧм ласта вывті. Войся зэрӧм бӧрын вӧр-ваыс эз на косьмы да вӧрас эз пырсьы, мыйла нӧ кӧтӧдчынысӧ. И тані сынӧд кӧрыс вӧлі зэв чӧскыд, да мый нӧ сэсся и колӧ карса мортыдлы. Зорӧд дорті мунігӧн нетшыштіс ки пӧвнас кос турунсӧ, вайӧдліс ныр дорас, нюкйис кольӧм гожӧмлысь кӧръяссӧ. Сувтыштліс. Семен Федорович сьӧрсьыс новлӧдліс пӧсь чай тыра термос. Юыштас неуна, шонтыштас пытшкӧссяньыс ордлыяссӧ, бара водзӧ мӧдӧдчас. Лыйны, дерт, сылы некоді эз паныдась, да висьтавлім тай нин, эз ёна и тӧждысь та вӧсна.

Сэсся Семен Федорович, гашкӧ, и бӧр бергӧдчис, но ылысянь на аддзис мыйкӧ зэв тешкодьтор: сэні, кӧні помасьӧ лыаыс, вӧлі куръя. Эз паськыд, но кузя пырӧ ласта бердтіыс да векньыдик ёльӧн йитчӧ юыскӧд, визӧбыс локтӧ и. Буретш куръя йывсьыс и аддзис суналысь зверсӧ Семен Федорович. «Вурд, — югнитіс сылӧн юрын мӧвп, — ей-богу, вурд». Но кыдзи матыстчыны сы дорӧ, вӧралысь эз на тӧд. Кывліс, тайӧ зверыс пӧ зэв варгӧс. А гӧгӧр эрд, сӧмын вӧртіыс позьӧ муныштны весьтасӧдзыс. Сідзи и вӧчис. Шыш моз пырис вӧрас, мед кок улас эз рутшнит пу ни палич. Зверсӧ аддзис да, лов шысӧ кутӧмысь весиг пӧдны кутіс.

«Со тай сійӧ, пыр на суналӧ, куръяӧ чукӧрмӧм мыкъяссӧ ӧктӧ. Но кыдзи сы дорӧ матыстчыны? Кыссьӧмӧн ковмас». Сэсся шыбитчис ва турун вылас, эз тай нин повзьы кӧтасьӧмысь, пондіс кыссьыны. Еджыд кролик ку шапкасӧ шыбитіс, мед оз повзьӧд зверӧс. Кыссьыны колӧ вӧлі ылӧкодь да тайӧ кадӧн юрас быд пӧлӧс мӧвпыс вевъяліс волыны: медводз синъяс водзас сувтліс вурд шапкаа морт. Тайӧ ачыс. «Мед оз потны ставӧн завидьысла».

Кыссигмозыс кыкнан стволас картеча патронъяс йӧткис — ылысяньджык позьӧ пезьгӧдны. Кӧтасьӧм вылӧ эз видзӧд да весиг ичӧтик гуран, коді слӧймис туй шӧрас да вӧлі тырӧма зэр ваӧн, эз гӧгӧрт, веськыда сэті уйис. Тшӧкыда ньӧжйӧ кыпӧдлывліс юрсӧ, мед видзӧдлыны, сэні-ӧ на зверыс. Сэн тай.

Кор Семен Федорович ас думсьыс воис лыян метьӧдз, лэптіс курокъяссӧ, чургӧдіс ружьесӧ. Витіс сы дыра, мый веськыд синсьыс синваыс ульӧбӧн мӧдіс визувтны да ковмис чышкыны. Бара метитіс да лыйис нин сэсся ӧти стволсьыс. Кор разаліс порок тшыныс, видзӧдліс, а зверыс век на суналӧ. Лыйис мӧдсьыс да бара видзӧдліс. «Что-за чертовщина, синъясӧс али мый пӧртмаліс?» — ас вылас кыз лӧгӧн думыштіс Семен Федорович да воськовтіс валань, кӧні пыр на дзӧрӧдіс, кыпӧдліс да вӧйтліс ва визӧбыс сылысь кыйӧданторсӧ. Тайӧ вӧлӧма кытыськӧ кылӧдӧм да ӧні джынвыяс пузувтӧм тыртӧм картон куд, кутшӧмын тай миянӧ вайлӧны кынтӧм чери. Семен Федорович нюжӧдчыліс термосланьыс, но сэні нинӧм нин эз солькъяв. Жугалӧма.


Гижӧд
Вурд шапка
Жанр: 

lkejrlkelkrgner klrjnelknfrkl ekjnrjkenfrej

1