НО И КӦЧ КЫЙЫСЬЯС


Кык друг кӧч вылӧ капканъяс пукталісны. Поводдяыс первойсӧ шоныд вӧлі, да кӧчьясыд эз ёна котравны, но регыд кӧдздӧдіс, и ылі ыбъяс гӧгӧр кузь пеляяс серпасалісны лымъя эрдсӧ кузяла и пасьтала.

— Ветлам талун, Миша, урокъяс бӧрын. Гашкӧ, пусьӧдас! — шӧпнитіс Вова парта сайын пукалысь ёртыслы.— Физкультура урок вывсьыс кыдзкӧ юасям, мед огӧ пемдӧй...

Сьӧкыд вӧлі пукавны ёртъяслы урокъяс вылын. Пельясныс нинӧм эз кывны, а син водзаныс — ыбъяс гӧгӧрмоз сулалысь гыӧртӧм кыдзьяс, на костті кытшлалысь кӧч кывтъяс, капканъясаныс шедӧм кӧчьясӧн.

Физкультура — бӧръя урок. Ёртъяс висьталісны велӧдысьлы, мый кӧсйӧны талун 15 километраа трасса видзӧдлыны, сӧталыштны черӧн лым улысь мыччысялӧм росъяссӧ, ӧшӧдчӧм коз лапъяссӧ, кодъяс сорӧны котралысьяслы. Владимир Иванович гӧгӧрвотӧг эз ов, мый кӧсйӧны челядь, но медся зіль спортсменъяслы эз вермы ӧткажитны, шуис сӧмын:

— Трассасӧ локтан ордйысьӧмъяс кежлӧ мед вӧлі писькӧдӧма!

Кӧдзыдыс кӧть и швичкис восьса ныр-вомъясӧ, ӧдйӧ мунысь челядь эз кынмыны, сӧмын ӧддзисны таысь. Тювгысисны-исковтісны сэсся джуджыд ыб вывсянь веськыда логӧ, медводдза капкан дорӧдзныс воисны.

— Тані абу и котравлӧма да... дерт, некоді абу шедӧма. Мунам водзӧ, — жугыльмис Миша. Нӧшта на и сыысь, мый капканыс вӧлі сылӧн.

Мӧд капканыс тыртӧм жӧ вӧліс, а коймӧдас шедӧма. А радлӧмыс челядьлӧн! Нӧшта кӧ пӧ ӧти — кыкнаннымлы лоас.

И збыльысь ӧд шедӧма... Кӧчыс капканас ловъя на вӧліс. Аддзис кыйсьысьястӧ, да ёна и чирӧстіс.

— Кучкыны колӧ юрас, — вӧзйис Вова.

— Оз ков, — Миша быттьӧ ставсӧ тӧдӧ.— Батьӧ висьталіс, кыдзи колӧ винысӧ, кор ловъя на кӧчыс. Колӧ сьӧлӧмсӧ жмитны. Вай тувччы капкан пружинаас, а ме босьта сэтысь кӧчсӧ да... Вообщем, ачыд аддзан.

Миша босьтіс кӧчсӧ кузь пельясӧдыс да корсис, кӧні тіпкӧ сылӧн повзьӧм сьӧлӧмыс, кутіс надзӧник жмитны. Доймӧмсьыс кӧч лёк ногӧн туркнитчис, мынтӧдчис Мишалӧн киясысь да ӧдйӧджык вӧрӧ... Кыкысь чеччыштлӧмӧн и саяліс кыддза раскӧ.

— Тадзи тэнӧ велӧдіс батьыд, да? — пычиктіс Вова.

— Эз эськӧ тадзи велӧд да... — век на эз эскыссьы, кияс вылас видзӧдӧмӧн шуыштіс Миша.— Овнысӧ тай... ёна кӧсйӧ...

Рӧмдігас нин ёртъяс воисны гортаныс.

Мынӧм кӧч йылысь некодлы эз висьтавны, а аслыныс век жӧ долыд вӧлі...


Гижӧд
Но и кӧч кыйысьяс
Жанр: 

lkejrlkelkrgner klrjnelknfrkl ekjnrjkenfrej

1