ОШ ЛОКТӦ


Пукалісны рытнас вуграсьӧм бӧрын куим ёрт да висьтавлісны, кодкӧд кутшӧм тешкодьтор вӧвлӧма чери кыйигӧн да вӧрті ветлігӧн. Дас вит арӧс сетан, а сёрни сертиныс нэм олӧмаӧсь, быдторсӧ вевъялӧмаӧсь аддзывны да тӧдлыны.

Ӧти казьтыліс:

— Коркӧ кыснаси Вис куръяын. Кодкӧ зэв ён крукасис. Колӧ кыскыны, а пыжа локтӧ, буретш рыбинспектор Пунегов. Дзебыштӧмӧн домалі кыснан кӧвйӧс пыж бокӧ, а ачым быттьӧ моторын лукйыся. Матыстчис Пунеговыд да юалӧ: мый пӧ вӧчан? Мися, моторӧй дудіс да оз кӧсйы заведитчыны. Сідзкӧ пӧ вӧч, шуис да кывтіс водзӧ. Кӧджыс морттӧ сайӧдіс, да босьтчи черитӧ лэптыны. Сьӧмга вӧлӧма. Нюйт пиас пырӧма да ӧдва и кыски. Порсь туша кодь вӧлі. Воккӧд кыкӧн катӧдім войнас пывсянӧдз.

Мӧдлӧн висьтыс вӧлі татшӧм:

— Батькӧд мӧдӧдчим чӧс туй кыйны. Сійӧ вожалӧ, а сэсся ӧтлаасьӧ да бӧр ӧти туй лоӧ. Ме ӧтар вожӧдыс муні, а бать — мӧдарӧдыс. Сэки буретш ошъяс вӧлі шӧйтӧны-гуляйтӧны. Нюр коліс вуджны. Петі вӧрысь, сӧмын воськовті нитш вылӧ, аддза: нюр шӧрын куим ош. Кыкыс ёрта-ёртсӧ летӧны, а коймӧдыс — найӧс кыкнансӧ. Ружьеӧй менам тридцать второй. Дрӧбъя зарадӧн, сьӧлаысь кындзи, нинӧм он уськӧд, а пулянас слӧнӧс позьӧ турбыльтӧдны, карабин вылӧ ог веж.

— Вывті жӧ эськӧ сӧран да. Ог веж пӧ...

— Эн торкав, кывзы водзӧ. Стволас пуляа патрон и вӧлі, мӧдӧс перйи, киам кута. Ӧти ошкӧс, мӧвпала, чергӧдны колӧ. Метиті-метиті. Дзӧрӧны да, некыдз ог вермы пезьдӧдны. Лыйи жӧ медбӧрын. Тшыныс разаліс да аддзи: куимнанныс гатшаӧсь...

— Сӧрнытӧ морт, велӧдны оз ков.

— Сӧра, шуан? Ёна мен окота. Он кӧ эскы, батьлысь юав.

— Сійӧ ӧд тэ кодь жӧ. Али тэ сы кодь? Ме вай нӧшта висьтала. Тайӧ дзик нин збыль вӧлі. Батькӧд вӧр керкаын олім, чӧс туй вӧчим-лӧсьӧдім, чери кыйим. Войясыс зэв нин пемыдӧсь вӧліны. Бать шуис ӧтчыд, вай пӧ кыбны лэччылам, оз-ӧ налимъяс сюрны юква вылӧ? Пӧрӧдім сирӧд пожӧм. Бать меным тшӧктіс чинтавны кык-куим кузя чуркаӧн, а ачыс муніс нӧшта пожӧм корсьны. Ме пилиті, кусӧді пилаӧс да пукси шойччыштны, батьлысь чукӧстӧм виччыся. Мышкам трачнитіс, но эг и бергӧдчыв. Мися, бать ветлӧдлӧ. Сэсся кыліс ума-ама. Бергӧдчи, а ошкыс дзик нин вылам кайӧма. Сувтӧма бӧр кокъяс вылас, водз гыжъяснас ворсӧ-сяркӧдчӧ. Вӧрзьыны оз лэдз. Ме кӧ вӧрзьышта, и сійӧ воськовтас. Пила кок улын, стартёр бокам ӧшалӧ. Босьті гусьӧникӧн, пукті пила помӧ, ӧдйӧ сувті да деркниті. Заведитчис ӧд. Ош мелань, а ме сылы воча. Газуйта, кыдз верма, чеп швыркйӧ-бергалӧ. Дзик ныр дорӧдзыс воліс, тӧкӧтьӧ юрсӧ эг пилит. Нӧшта кӧ неуна и. Повзис ошкыд да горзігтыр муніс ме дорысь. Повзьӧмысла дрищитӧма зэв кизьӧра.

— Ачыд быттьӧ эн и повзьы?

— Повзьылі жӧ, мыйла эг?

Коймӧд зонкаыс чӧв оліс. Сійӧ ошъяскӧд эз паныдасьлы, ошйысьны нинӧмӧн, да и эз радейт нинӧм абусӧ больгыны.

Друг вӧрас мыйкӧ дзуртыштіс да ратшмуніс. Тадзсӧ пу пӧрлӧ. Чӧв олысь зонкаыд горӧдіс:

— Ош, ош локтӧ!

Кык другӧс бипур дорсьыд быттьӧ тӧв ныр пӧльыштіс. Чепӧсйиганыс чайниксӧ пӧрӧдісны, бипурсӧ разӧдісны, чой вывсянь кытчӧкӧ чеччыштісны пемыдас. Пыжӧ ӧтиыс эз веськав да ваӧ бузгысис. Мӧдыс йӧткыштчӧма нин берегсьыс да горзӧ:

— Кавшась пыжас! Кӧні Кӧсьтаыс?

А Кӧсьта сералӧмысла туплясис берег вылын. Сійӧ эз думайт, мый тадзи повзясны «быдтор тӧдлысь» ёртъясыс.


Гижӧд
Ош локтӧ
Жанр: 

lkejrlkelkrgner klrjnelknfrkl ekjnrjkenfrej

1