МЕДАЛЬ


Ӧсип Микул радейтіс пывсьыны бӧръяӧн. Ӧтнасӧн пырас да мыйкӧ жӧ и швачӧдчас корӧсьӧн. Оз тэрмась — мукӧд дырйи куимысь эштылас ыркӧдчыштнысӧ петавны кӧджас. Со и талун, колхоз му вылын потшсьӧм бӧрын, рытгорувнас суседыс чукӧстіс сійӧс. Пывсян пӧ ломтылім, шуис суседыс, старик гозъя пӧ пывсим нин. Кӧсъян кӧ пӧ, Микулай, ӧдъя на пывсяныс.

Микул и муніс. Пӧттӧдзыс небзьӧдіс лысьӧмсӧ. Петіс кӧджас. Пукалыштіс лабичын да кӧсйис ещӧ на пыравны. Друг кылӧ: кык детинка вензьӧны. Гӧлӧсъясныс ӧтарӧ матыстчӧны. Дзик пывсян дорас нин сэсся лоины. Ӧтиыс, гӧлӧс сертиыс, Микуллӧн внукыс, Ваня. Мӧдыс — суседлӧн внукыс, Игорь. Сувтісны, тыдалӧ, ӧдзӧс дорас да оз и думайтны ӧвсьыны. «Мый бара юкӧны-а?» — думыштіс Ӧсип Микул да кывзысьны мӧдіс. Сулалӧ Микул, ӧдзӧс вугйӧ кутчысьӧмӧн, да быттьӧ кутшӧмкӧ радиоспектакль кывзӧ. Аддзынытӧ оз аддзы, а сёрнитӧмыс ясыда кылӧ. Со кыдзи и вензисны кык зонка:

Игорь. А ме тэнӧ водзджык аддзи!

Ваня. Эн сӧр! Ме на водзджыксӧ казялі! Визя-визя картузыд мӧвкнитіс, кор туй вомӧн котӧртін.

Игорь. Ме асьтӧ казялі, кор Лыскоыс тэ вылӧ эргыны мӧдіс. Автоматыд тай ещӧ кисьыд усьлі, повзин да.

Ваня. Ачыд тэ повзин! Ме тэнӧ Лыскоыскӧд паныдасьтӧдз на казялі, потшӧс пӧлӧныс кор уйи.

Игорь. Но ме водзджык лыйи!

Ваня. А вот и ме! Турун пӧвстсьыс кыпӧдчигад и шковги, а тэ бӧрас нин сісь пищальсьыд — «пых-пах»...

Игорь. Ачыд тэ сісь. Вай, сідзкӧ, бӧр автоматӧс.

Ваня. А тэ медальсӧ вай.

Игорь. Медальсӧ? Ме сы пыдди эг куш автоматӧс сет. Кык кыснан дай жилка-кӧв на содтылі. Батьӧ тэ вӧсна куим лун корсис кыснанъяссӧ. Ачыс дорӧдлӧма.

Ваня. Сідзи тэныд и колӧ.

Игорь. Сідзи, да? Сідзи, да? Вешйы пывсян дорсьыс! Асланыд дорын мун ниртчы.

Ваня. Тайӧ абу жӧ тэнад. Дедыдлӧн. А ті выль керкаын оланныд. Онӧ нин дедыдъясын.

Игорь. «Онӧ нин дедыдъясын». А дедыс нӧ тэнад?

Ваня. Менам дедыс тэнад серти дас пӧв бур. Вот!

Игорь. Хы! Кӧсъян кӧ тӧдны, тэнад дедыд менам водзын чаль дон оз сулав.

Ваня. Ланьт, колӧкӧ, а то сетышта пель бокад...

Игорь. Видлы. Водзӧссӧ сета жӧ.

Ваня. Пӧрччы, мися, медальсӧ! А то дедӧлы висьтала, мый мырдӧн корин.

Игорь. Висьтав, колӧкӧ. Дедыд асьтӧ сыысь...

Игорь эз удит помавны висьталӧмторсӧ, кыдзи дзуркнитіс пывсян ӧдзӧсыс. Ӧдзӧс костӧд мыччысис ведраа ки, а сэсся Ваня дедлӧн юрыс. Ваня чуймӧмӧн видзӧдліс дедыс вылӧ. Виччысьтӧмысла весиг автоматыс кисьыс мыні. Шӧйӧвошліс и Игорь; эз тӧд кытчӧ и воштысьны. Гезторйӧн волысалӧм бедьсӧ (пищаль пыддиыс сійӧ и вӧлі) кыкнан кинас чабыртіс. Быттьӧ отсавны вермис беддьыс мыйӧнкӧ.

— Казакъяс, — зэв меліа шуис Ӧсип Микул, быттьӧкӧ нинӧм эз и кывлы да оз тӧд, — вай, казакъяс, кӧдзыд ватор меным гӧнитӧдӧй. Юкмӧс дор бӧчкасьыс гумовтӧй дай. Эн тырыс сӧмын, а то сьӧкыд лоӧ.

Детинкаяс вӧлисти сайкалісны.

Ваня тэрыба кватитіс ведрасӧ дед киысь. Сійӧ жӧ здукас Игорь кутчысис ведра вугйӧ. Кыкнаныс, ведрасӧ довйӧдліг тыр, и котӧртісны юкмӧс дорӧдз. Кыкнаныс — буз-баз! — и гумовтісны васӧ. Кыкнаныс — кутшӧм зільӧсь лоисны! — и нӧбӧдісны ва тыра ведрасӧ пывсянӧдз. Кыкнаныс — ылалісны тай зілиганыс — и пыртісны васӧ кӧджас.

— Со ӧд, казакъяс, кор ладманныд, и уджыс вӧчсьӧ ладӧн, — ошкыштіс Ӧсип Микул. — Ӧти сайын пывсянас пыртӧй ведрасӧ, ӧшинь дорас сувтӧдӧй. Меным ваыс оз нин ков, а видзи васӧ да, водзӧс пыдди лоӧ тайӧ.

Ваня да Игорь пыртісны васӧ да кӧсйисны бӧр звиркнитны ывлаӧ. Но дед, вӧлӧмкӧ, эз на помав сёрнисӧ:

— Часлы, казакъяс, пуксьылӧй мекӧд орччӧн. Варовитыштны окота. Эн яндысьӧй, шойччӧй.

Лабичыс вӧлі «Г» буква модаа, кык стен пӧлӧн лӧсьӧдӧма. Шӧр пельӧсас пукаліс Микул дед. Гачасьӧма нин. Сапӧг пӧла нин и. Мӧд пӧлысла копыртчис. Ваня пуксис ылі пельӧсас. Игорь ӧдзӧс дор пельӧсас полігтыр пуксис. Чӧв усьлісны ставӧн. «Кывліс, буракӧ, пинясьӧмнымӧс?» — думыштіс Игорь. «Видны кӧ ӧні кутас?» — видзчысис Ваня. «Кыдзи и сёрнитыштны накӧд?» — думнас ассьыс юаліс Микул.

— Кыдзи нӧ татчӧ веськалінныд? — юаліс сійӧ.

— Сідз, — вочавидзис Ваня.

— Прӧстӧ сідз? — юаліс Ӧсип Микул да внукыс вылӧ читкыра синмӧн видзӧдліс.

— Сідз, — шуис Ваня да содтіс: — Войнаӧн ворсім.

— Войнаӧн? Кодныд нӧ верминныд? — мӧд сапӧг пӧвсӧ кӧмалігмоз юаліс Ӧсип Микул.

Некоднаныс эз путьмыны ясыда вочавидзны. Сӧмын пельпомъяснысӧ лэптыштлісны: коді пӧ кодӧс вермис, сьӧкыд шуны.

— А вензьӧманыд коді кодӧс вермис? — виччысьтӧг юаліс Микул.

«Кывлӧма»... — дӧсадапырысь мӧвпыштіс Ваня да пель йылӧдзыс гӧрдӧдіс. Ляс нырыс ещӧ нин быттьӧ лясмис.

А Игорь визя-визя картузсӧ пӧрччис да морӧс бердас топӧдіс, быттьӧ жар лои да прӧстӧ сідз кутӧ. Думсьыс медальсӧ сайӧдіс. Волысалӧм бедьсӧ мӧд кинас морӧсланьыс жӧ вештыштіс. Дед, быттьӧкӧ нинӧм эз казяв, шуис:

— Дӧрӧмасьны пӧра, — нюжӧдчис тувйын ӧшалысь дӧрӧмысла и ойӧстіс: — Ой! Кыдз лыйыштіс.

Ӧсип Микул кутчысис морӧсас. Важ дойсӧ тупкис — ранитчылӧма сійӧ Отечественнӧй война вылын. Пуляыс шуйга морӧсас пырӧма, киняулӧдыс петӧма. Сьӧлӧмас муртса абу веськалӧма.

Недыр мысти Микул дед вештіс кисӧ морӧссьыс, пидзӧс вылас лэдзис. Кокньыдика лолыштіс:

— Кызь кык во сайын фашистыд лыйис, а ӧнӧдз кылӧ. Лёк поводдя водзын. Зэрмас, тыдалӧ, аски.

Игорь шензьӧмӧн видзӧдліс Ӧсип Микуллы морӧсас. Вомыс калькмунлі. Весиг картузыс мыніс кисьыс. Ваня дедлӧн морӧсас тӧдчис ыджыд рубеч. Со кутшӧм пас кольӧмаӧсь сылы немецъясыд нэм кежлӧ! А сійӧ, Игорь, кутшӧм мисьтӧма шуасис сы йылысь ӧнтай.

Дӧрӧмасигмозыс Ӧсип Микул бара юаліс:

— Вензинныд, мися, да ӧти кывйӧ воинныд али кодныдкӧ веніс? Мыйысь нӧ сідз эн ладмӧй? Мый эн юкӧй?

Детинкаяс эз повны вензьӧм вӧсна. Медаль — со мый вӧсна лои кыкнанныслы яндысьны.

— Ме тай шуа, войнаӧн ворсім, — смелмӧдчис Ваня. — Кытчӧкӧ мукӧдыс ставӧн пышйӧмны нин. Юксим кор, лои ме немеч, а этійӧ, — юрнас довкнитіс Игорьлань, — этійӧ роч. Ме сы бӧрся Микит керка дорсянь кыйӧдчи.

— А ме, — шыасис Игорь, — а ме Ӧграм юкмӧс дорсянь кысси.

— А ме сё равно водзджык лыйи, — ярскӧба шуис Ваня.

— Водзджык тай, — эз сетчы Игорь. — Ме водзджык-а...

— Гӧгӧрвои, казакъяс. Лыйӧмныд вӧсна венӧ волінныд, — шуис Ӧсип Микул. — Нинӧм шуны, война вылас быдторйыс овлӧ — бурыс и лёкыс. Игорьлы со, видзӧд, медаль нин сетӧмаӧсь. «За отвагу» тай ещӧ. Тайӧ медся ыджыд салдатскӧй медаль. Куим самолёт серпасалӧма. Танк. «СССР» гижӧд уліас дай.

Игорь эз сяммы вочавидзны да джоджас лэдзис синъяссӧ, быттьӧ кок увсьыс воча кывсӧ корсис.

— Гашкӧ, тэ, Иван, наградитін? Тэ Указсӧ гижин? — Ваня дінӧ шыӧдчис дедыс. — Эн тэ наградитлы?

Ваня нырнас кыскыштіс да пельӧсӧ видзӧдігмоз муртса кывмӧн шуис:

— Ме сеті...

— Но и шань, — друг мелі лоис Ванялӧн дедыс. — Шань кӧть висьтасин. Тэ, Игорьӧ, бӧр босьт Иваныслысь автоматсӧ. А сійӧс, мый содтылін, ну батьыдлы. Содтӧд сетӧмасӧ эн на вошты, Иван?

— Эг на... Сарай лес улын, банкаын.

— Но и шань, казакъяс, — шуис Микул да кыкнаннысӧ пельпомӧдыс тапнитіс. — Войнанад ворсны позьӧ, но олӧмад ӧта-мӧдкӧд ладмыны колӧ. Ладмытӧгыд нӧ кутшӧм олӧм? Вай ӧні котӧртӧй да пуктӧй медальсӧ, кӧні вӧлі. Сійӧс ӧд би улын ветлӧмысь сетлӧма. Праздник лунӧ абу грек аслым сійӧс морӧс вылӧ ӧшӧдлыны.


Гижӧд
Медаль
Жанр: 
Ӧшмӧс: 

lkejrlkelkrgner klrjnelknfrkl ekjnrjkenfrej

1