КЫДЗИ ВОШЛІС МАРИНА


Марина ылаліс.

Пыралісны мамыскӧд кӧмкотӧн вузасян магазинӧ. Мамыс Мариналӧн сувтіс касса дінӧ ӧчередьӧ. Мариналы выль камаш бӧрйис да, мынтысьны колӧ вӧлі.

— Мунім вай, Марина, — шуис кодкӧ мужичӧй.

Чуймискодь Марина да бергӧдчис гӧлӧс шы вылас, а вӧлӧмкӧ мӧд нывкаӧс корӧны.

Батьыс нывкаыслӧн аслыс зэв кузь чӧръя сапӧг ньӧбӧма. Нывкасьыс, гашкӧ, джуджыдджык лоӧ сапӧгыс. Ӧти киас батьыс нуис сапӧг гозсӧ, а мӧднас Марина нывсӧ кутіс ки пӧлӧдыс. Нывкаыслӧн мичаник лейка вӧлі киас, батьыс, тыдалӧ, ньӧбӧма. Лейкаыс, видзӧдан да, царевна-лягушка быттьӧ. Турунвиж рӧма и. Юрыс лягушка-лейкаыдлӧн весиг сорса-коронаа. Коронаыс вевт пыдди — нетшыштан сійӧс, да и позьӧ ваӧн тыртны лейкасӧ. Сійӧ нывка бӧрсяыс и Марина тшӧтш петіс ывлаӧ. Найӧ кежисны шуйгавыв. Марина — на бӧрся. «Видзӧдышта лейка вылас, а сэсся и бӧр мамӧ дінӧ локта», — татшӧм мӧвпӧн и восьлаліс Марина.

Мамыс Мариналӧн мынтысис, чекнас вузасьысь дінӧ вешйис. Видзӧдӧ гӧгӧр — Маринаыс некӧн оз тыдав. «Петіс, буракӧ, ӧдзӧс саяс виччысьӧ», — мӧвпыштіс мамыс. Но Марина и ӧдзӧс саяс матын эз вӧв. «Кытчӧ бара и шувгыштӧма? Автобус сувтанінӧ? Али паркланьыс?» — мамыс синнас корсьӧ нывсӧ, но весьшӧрӧ. Ещӧ пыраліс магазинас. Абу. Но кӧні? И мӧдіс Мариналӧн мамыс веськыдвыв: гашкӧ, пӧ и паркланьыс кежис? Но и сэні нылыс эз тыдав. А сэк кості Марина бергӧдчис да бӧр воис магазинас. Пырис, а мамыс абу. Чукыртчӧм чужӧмӧн петіс ывлаӧ. Вот-вот бӧрддзас. Видзӧдӧ ветлысь-мунысь йӧз вылӧ — мамыс на пӧвстын абу. И бӧрддзис Маринаным. Зэв шога бӧрддзис. Синваыс кӧтӧдіс мугов бандзибсӧ.

— Мый нӧ, дзоля морт, шогсян? — юаліс пӧрысь гӧлӧса кодкӧ.

Лэптіс вазьӧм синъяссӧ Марина — тошка дедӧ юасьӧ сылысь. Марина нинӧм эз вочавидз, бӧр лэдзис муас синъяссӧ да сыркъявны кутіс. Но дед эз лэччысь:

— Он тай и кӧсйы сёрнитны мекӧд. Коді нӧ тэнӧ ӧбидитіс?

— Этійӧ... мамӧ... мамӧс... вошті.

— Воштін? Кыдз нӧ сідз артмис? — дедлӧн гӧлӧсыс тіралӧ, но мелі.

— Петавлі ме магазинсьыс, а сэсся пыри, а сэсся мамӧ абу, а сэсся вошті, — вочавидзис збойджыка нин Марина, но сыркмунліс на.

— Гӧгӧрвоа, нылук. Колӧ корсьны. А кӧн нӧ оланныд?

— Васьӧ дядьӧясын. Ми сы ордӧ гӧститны локтім деревняысь, — висьтасис Марина. — Тэ, дедӧ, сылысь керкасӧ он тӧд? Зэв ыджыд керка. Балконъяса. Вит судта.

— Уна тай ӧні сэтшӧм керкаыд. Но Васьӧ дядьтӧ ог тӧд.

— Ачыд пӧрысь-а, он тӧд, — нюжӧбтіс Марина. — Сэні ещӧ милиционер олӧ. Сергей дядьӧн шуӧны. Сылӧн ещӧ ныв эм. Марина жӧ нимыс.

— Сідзкӧ, и тэ Марина? — юаліс дед. — Со ӧд, и менам внучкаӧй Марина.

— А миян деревняын Оля мамлӧн ичӧт нылыс бара жӧ Марина.

— Аттӧ тай, мыйта тьӧза лӧсьӧдӧмны тэныд, — шпыньмуніс дед.

Мариналы дум вылас мамыс бара уси:

— А мамӧ, кӧнкӧ, менӧ корсьӧ...

— Корсьӧ, дерт, — шуис дед да содтіс: — Милиционер, шуан, Васьӧ дядьыдъяс керкаын олӧ? А миянлы милицияыс и отсалас мамтӧ корсьны.

И мӧдӧдчисны пӧрысь морт да ичӧт морт карса милицияӧ.

Кор пырисны милицияын дежуритысьяс кабинетӧ, ӧти милиционер — погонъяса, а кыкнан погонас нёль ичӧтик звёздочкаӧн ляскалӧма, — стӧч сійӧ здукас телефон пыр сёрнитіс кодкӧдкӧ:

— Но-но, бур. Шань сэсся. Ме дінӧ со йӧз воисны. Асьтӧ видз, мамсьыд ылӧ эн вешйы, мед он усь ваас. Ме локта жӧ регыд. Ставыс сэсся, Марина, ставыс.

Марина бара кыліс тӧдтӧм выль тьӧзкалысь нимсӧ да торйӧн меліа видзӧдліс телефон трубкасӧ пуктысь милиционер вылӧ. А милиционерыс стрӧгакодь юаліс:

— Кутшӧм могӧн, граждана?

Дед водзлань воськовтіс да шуис:

— А могыс, капитан ёрт, абу ичӧт. Со тай Марина воштысьӧма.

— Мыйкӧ ыджыдтор? — юаліс милиционер.

— Абу ичӧт воштӧгыс. Мамсӧ воштӧма, — вочавидзис дед. — Сідз тай вот. Колӧ отсавны мортыслы.

— Отсавтӧг ог кольӧй, быть корсям. А кыдз нӧ тайӧ артмис, Марина? — милиционер чеччис улӧс вылысь, матыстчис Марина дінӧ, юрӧдыс сійӧс малыштіс.

Дед да Марина ставсӧ, кыдзи лоӧма, висьталісны. Милиционер пуксис да, мый колӧ, гижаліс.

— Аддзан, Марина, мамтӧ, — шуис сійӧ да небыдика нюмъёвтіс. — Сідзкӧ, шуанныд, Сергей дядь сійӧ милиционерыс, коді олӧ Васьӧ дядьыдъяс керкаын? Коді нӧ миян сэтшӧмыс? А-а... Муравьёв тӧвнас выль керкаӧ овмӧдчыліс. Сідз-кӧ, сійӧ! Сійӧ! Сылӧн нылыс, буракӧ, Марина и эм.

Сэки кабинетас пырис ещӧ ӧти милиционер.

— Воин? — шыасис сы дінӧ тані дежуритысьыс — Колӧ со вит арӧса гражданкаӧс нуӧдны мамыс дінӧ. Муравьёвыс, тӧдан, кӧні олӧ? Сы керкаӧ. Муравьёвлысь нывсӧ кыдзи шуӧны? Марина? Но, сідзкӧ, сэтчӧ.

Дедкӧд да локтӧм милиционеркӧд Марина петіс ывлаӧ. Кильчӧ дорас сулаліс коляскаа мотоцикл. Мотоцикл дорас сулаліс кутшӧмкӧ нывка. Кӧсичаясас бантикъяс. А орчча лабич вылын пукаліс нывбаба. Нывкаыс нёняліс мороженӧй. Мороженӧйыс нывкалы платтьӧ морӧсас некымынысь нин войтыштӧма. А нывка оз и казяв. Курччыштас мороженӧйсӧ ичӧтика да бара видзӧдӧ мотоцикл коляска вылас: кыдз пӧ тані и пукалӧны?

— Батьӧ, — виччысьтӧг шыасис нывбабаыс да чеччис лабичысь.

— Но, ті тай танӧсь! — шензьӧмӧнмоз шуис дед.

Нывкаыс аддзис дедсӧ да сы дінӧ чепӧсйис.

— Дедук, а ми мамкӧд паркын вӧлім. Ме карусель вылас кыкысь пуксьылі. Вӧв вылӧ, а сэсся порсь вылӧ. Ӧтнам ӧд, мамӧтӧг.

Марина гӧгӧрвоис: тайӧ и эм внучкаыс дедлӧн. Марина внучкаыс.

Дед шпыньмуніс да шуис:

— Мамыдтӧг? Молодеч! А со Марина тьӧзаыд мамыстӧг жӧ, — мамсӧ воштӧма. Лоас милиция отсӧгӧн корсьны.

Внучкаыс дедлӧн любӧпырысь видзӧдліс мамсӧ воштӧм Марина вылӧ. А сэсся юаліс:

— Милицияыс и мам корсьны кужӧ?

— Быть ӧд корсь, — дед пыдди вочавидзис милиционер. — Мамтӧгыд абу на шондібан.

Милиционерыс пуксьӧдіс Маринаӧс коляскаас, а ачыс пуксис руль сайӧ.

— Ӧні, Марина, мамтӧ аддзан нин, — шуис дед да мыччис сарӧгӧссьӧм пӧрысь кисӧ. — Водзӧ меным мамыдкӧд нин паныдась. Но?

— Но, — кӧсйысис долыдмыштӧм Марина.

Таргӧбтіс мотор, и мотоцикл чепӧсйис водзӧ, быттьӧ дом йылысь мыні.

— Эн пов, Марина, регыд жургӧбтам мамыд дінӧ, — шуис милиционер да содтіс ӧдсӧ. Ачыс сюся водзӧ видзӧдӧ.

Мотоцикл первойсӧ тювгис веськыда, сэсся шуйгавылӧ кежис. Сідз мунісны вомӧна уличаӧдз, а сэні бара бергӧдчисны да недыр мысти воисны выль керкаясӧдз. Ӧти керка весьтын милиционерыс рульсӧ крута шуйгавыв бергӧдіс да дзик керка ӧдзӧс дорас и сувтӧдіс мотоциклсӧ.

«Воим нин!» — радпырысь думыштіс Марина. Видзӧдліс гӧгӧр. Но мый тайӧ? Пу кок йылын сулалысь пу тшакъяс лоӧмны турунвижӧсь. И лабичьясыс турунвижӧсь жӧ. А ӧшинь улас пуясыс ляпкалӧмаӧсь. Ворсысь челядьыс мӧдъяс. «Сідзкӧ, и керкаыс мӧд? — думнас ассьыс юалӧ Марина. — Мыйла нӧ сувтім? Буракӧ, шойччӧдӧ мотоциклсӧ».

— Кутшӧм судтаын олӧ дядьыд? — юаліс милиционер аслас пуклӧс вывсьыс чеччигмоз.

— Коймӧдын, — вочавидзис Марина. — А регыд нин воам?

Милиционер эз гӧгӧрво, синъяссӧ сувтӧдліс Марина вылӧ. Юаліс:

— Кытчӧ? Эгӧ мӧй воӧй?

— Васьӧ дядьӧ оз тані ов. Керкаыс дзик татшӧм, а пу тшакъясыс сэні гӧрдӧсь, еджыд чутъясаӧсь ещӧ, — жугыля висьталіс Марина.

— Но инӧсь! А Муравьёв Сергей дядьыс тані олӧ. И Марина сылӧн эм. Со тай сійӧ, со тай! Квасла, тыдалӧ, ветлӧма.

Ар сизима нывка, лӧз дзоридзьяса платтьӧа, панамаа, локтіс гортас. Киас вӧлі неыджыд бидон. Квас, буракӧ, и вайис.

— Видза олан, Марина, — чолӧмасис милиционер. — Батьыд гортын?

— Абу, — вочавидзис бидона Марина. — Вуграсьны муніс Потапов Сергей дядькӧд.

— Ак тэ, Марина! — виччысьтӧг долыдмис милиционер. — Молодеч! Потапов Сергей дядькӧд, шуан? Вот, Марина, — шыасис сійӧ коляскаын пукалысь дінӧ нин, — вот тэ, вӧлӧм, кӧні олан! Сійӧ Сергей дядьыслӧн овыс Потапов, кодлӧн тай Марина жӧ нылыс. Миянын неважӧн на уджалӧ, да пырсӧ эз и во юраным.

Керкаысь петіс шляпаа дядьӧ. Ӧчкиа дай. Лыаӧн ворсысь челядь чукӧрысь сы дінӧ котӧрӧн локтіс аканя нывка да тэрыба юӧртіс:

— Геня дядь, тіян Маринаыд менам аканьлысь кисӧ орӧдіс.

— Но-о? А кытчӧ нӧ ачыс воштысис?

— Этатчӧ, пельӧс саяс, дзебсис, — бара тэрыба вочавидзис нывкаыс да кӧмтӧм кок пыдӧссӧ гыжйыштіс.

«Бара Марина!» — шензьӧмӧн мӧвпыштіс коляскаын пукалысь.

— А ті со мый. Пырӧй миянӧ, Галя тётяыд гортын. Вурӧй да и бара киа лоас аканьыд, — сӧветуйтіс шляпаа мортыс да чукӧстіс: — Марина!

Пельӧс сайысь мыччысис кузь кока нывка. Сійӧ радпырысь матыстчис первойя нывка дінӧ да корис гортас: збыль, вурам пӧ кисӧ аканьыдлысь.

Милиционер бара пуксис мотоцикл вылӧ.

— Эн ӧшӧд юртӧ, Марина, — шуис сійӧ. — Здукӧн гортӧдзыд вайӧда. Ӧні стӧч нин адресыс.

И збыль, петісны бара асфальтируйтӧм туй вылас да, регыдӧн и жургӧбтісны. Кежисны колана керка дворас, а мамыс Мариналӧн сумкаӧн локтӧ керка мӧдар помсяньыс.

— Мамӧ!

— Нылукӧй, донаӧй! — уськӧдчис воча мамыс. — Быдлаысь корси. Милицияӧ шыӧдчыны ковмис. Сэні сӧмын ас садьӧ вайӧдісны: гортад пӧ мотоциклӧн котӧртіс. Аттьӧ тіянлы, бур морт, — милиционер дінӧ нин шыӧдчис мам. — Тшӧтш сюрис тіянлы.

— Мамӧ, — шуис Марина. — Эм ещӧ мӧд Сергей дядь милиционер. И сылӧн Марина жӧ эм. Квас вайис.

— Со ӧд, нылукӧй. Тӧдмасин али мый?

— А ми первой найӧ керка дінӧдз волім, а Васьӧ дядьӧ оз сэні ов.

Мотоцикла милиционер веськыд кисӧ фуражка кӧзыр бердас инмӧдліс — честь сетіс. Шуис:

— Видза колян, Марина! Водзӧ вылӧ кӧ карас вошан, ме дінӧ веськыда лок. Лёка ӧдйӧ вайӧда. — И муніс.

Воча сулалысь, татшӧм жӧ, вит судта керка ӧшинь улын челядь сувталӧмны кытшӧн. Зонкаяс и нывкаяс. Тыдалӧ, дзебӧн ворсны лӧсьӧдчӧны. Миян Маринаным сэтысь и казяліс Маринаӧс Сергей дядь милиционерлысь, коді тай Васьӧ дядьӧяс керкаын олӧ. Кытш шӧрӧ сувтӧм детинка лыддьӧдліс:


Ӧтик-мӧтик,

Кык-мык,

Куим-нуим,

Нёль-моль,

Сэсся мыйта

Кӧть эн доль,

Куталысьнас

Ме ог коль.


Кутавнысӧ стӧч Мариналы уси. Ставӧн ызгысисны ӧтарӧ-мӧдарӧ, мед дзебсьыны казявтӧминӧджык. А Марина тупкис синъяссӧ кияснас да лыддис кызьӧдз. Сэсся и мӧдіс корсьысьны дзебсьысьясӧс. Сійӧ, синъяснас кыйкъялігтырйи, котӧртіс таланьӧ. Аддзис Маринаӧс мамыскӧд. Быттьӧкӧ вуніс сылы усьӧм могыс — нимкодя шыасис:

— Марина! Кӧн вӧлін? Ме нин важӧн садйысь локті, а тэ абу. А меным батьӧ со выль сандали ньӧбис. Петан ворсны миянкӧд?

— Пета, пета, — вочавидзис вошлӧм Марина.

— Петас, сӧмын чай юас — и петас, — содтіс и Мариналӧн мамыс. — Аски ми мунам нин гортӧ, а талун ворсӧй на ӧтлаын.

Марина да мамыс кайисны поскӧд коймӧд судтаӧ. Кыпӧдчиганыс мамыс мӧвпаліс: «Со ӧд кымын мортӧс лои вӧрзьӧдӧма, дзоля нывкалӧн ылавсьӧма да. И дедлы, видзӧдтӧ, вичмӧма тӧждысьыштны. И милицияыдлы. Весиг мотоциклӧн вайӧдісны».

А Мариналӧн мӧвпъясыс татшӧмӧсь вӧліны: «Локта деревняӧ да Оля мамлӧн Мариналы ошйысьышта. Карас, шуа, эм и лейкаа Марина. И дедлӧн внучкаыс Марина. И милицияас дежуритысьыслӧн Марина. И квас вайысь Марина. И аканьлысь кисӧ орӧдысь Марина. И Васьӧ дядьӧяс керкаын олысь Сергей дядь милиционерлӧн Марина. Вот, шуа, а ми чайтлім — сӧмын тэ да ме».


Гижӧд
Кыдзи вошліс Марина
Жанр: 
Ӧшмӧс: 

lkejrlkelkrgner klrjnelknfrkl ekjnrjkenfrej

1