КАТЕР


Вася талун водз-водз садьмис. Кыскыштіс шебрассӧ, бергӧдчис мӧд бок вылас, кӧсйис ещӧ на узьыштны. Но сэки и усис дум вылас, мый батьыс шуис аскӧдыс босьтны Васяӧс мӧдлапӧлӧ. Мӧдлапӧлас — колхозлӧн видзьяс. Сэні, Кытшыль ты бокын, эм неыджыд чом. Чомйын турун пуктысьяс гожӧмнас войковтлӧны. Сэтчӧ и лӧсьӧдчис гӧнитлыны аслас мотора пыжнас Васялӧн батьыс. Кӧсйис видзӧдлыны, эз-ӧ тавося тувсов ытваыс чомсӧ путкыльт. Таво ытваыс торъя нин ыджыд. Мӧдлапӧлӧ видзӧдлан — быдлаын расъяс костӧд ва лӧзалӧ, кӧть эськӧ ваыс тӧдчымӧн чиніс.

— Чеччин, Васьӧ? — шуис батьыс пызан вылӧ пузьӧм самӧвар лэптігмоз. — Мыссьы. Сёйыштам-юыштам да и дзижнитлам бӧра-водз.

— Мамӧ картаын?

— Сэні. Локтас регыд. А ме нин мыйтакӧ дорччышті. Васялӧн мамыс скӧтничааліс. А батьлӧн уджаланіныс — кузнеча.

Ая-пиа сёйисны жаритӧм картупель, юисны йӧла чай. Чайсӧ юигмоз Вася ӧтарӧ видзӧдлывліс ӧшиньӧд горулӧ. Горулас, ичӧт шор вомын, вӧлі пыжыс батьыслӧн. А сэсся ва, ва и ва. Муркъялӧ Печораыс: долыд сылы, кыз йи кышӧдсӧ шыбитіс да. Да и Васялӧн долыдлуныс тӧдчӧ — сьӧдоват синъясыс нюмсӧ оз дзебны.

— Ми ӧд, батьӧ, регыдӧн вуджам? — юаліс Вася.

— Рыт кежлас, чайта, воӧдчам мӧдлапӧлӧдзыс, — шмонитӧмпырысь вочавидзис батьыс.

— Рыт кежлас? — шензьӧ Вася. — Огӧ жӧ. Ми толькӧ тр-р-р-р! — и сэні нин. Да ӧд?

— Вывті жӧ тэ, пиук, тэрыб. «Тр-р-р-р!» — нерыштіс батьыс. — Но, кӧмась, пасьтась.

Кор ая-пиа вӧрзисны берегысь, ю кӧдж сайысь мыччысис пуръя пароход. Мыччысис да пыр и тшынсӧ трубасьыс койны кутіс, быттьӧ, ая-пиаӧс аддзис да, нимкодьыс петіс.

Ойдӧм Печоратӧ, дерт, ӧти здукӧн он вудж. Но коркӧ и мӧдлапӧлыс воис. Дугӧдіс Васялӧн батьыс моторсӧ. Пыж зургысис-кайис нырнас ӧтаваа берегӧ. Чомйыс тасянь зэв матын. Пуръя пароход нач ая-пиа весьтті кывтны кутіс. Кывтӧ оз ӧдйӧ, пурйыс ыджыд, кузь, падмӧдӧ пароходсӧ. Но пароходыс, уджач морт моз, оз сетчы, выныштчӧмӧн кыскӧ и кыскӧ.

— Пароходыс ӧд, батьӧ, медся вына? — юаліс Вася.

— Медся ли абу-а, выныс, дерт, эм, — пыж нырсӧ якӧр чептӧд вывланьджык кыскыштіг вочавидзис батьыс.

— Пароходыс ӧд кык кӧлесаа, абу кутшӧмкӧ катер кодьыд.

Васялӧн батьыс мыськыштіс кияссӧ, васӧд кинас бӧрлань шыльӧдіс юрсисӧ, бӧр шапкаасис.

— Мунім, Васюк.

Батьыс восьлаліс водзын. Сы бӧрся посни, тэрыб воськовъясӧн муніс Вася.

— Катерыд, Васюк, аслас местаын колӧ жӧ. Тэ тай со гражданиныс абу ыджыд, но морт.

— Катерыс ӧд оз быдмы, — шуис Вася. — А ме нин арнас школаӧ муна.

— Но и мый?

— А мый? Вот регыд быдма, тэ кодь жӧ вына лоа. А катерыс пароход ыдждаыд некор оз ло. Оз ӧд? Вася видзӧдліс бӧрвылас. Визулысла пур бӧжыс нюкыльтчӧма, быттьӧ сибӧдчыны окотитӧ. Пароходыс сиктладорӧ нырсӧ бергӧдіс: водз на пӧ, пурйӧй, сибӧдчыныс.

Видзӧдігас Васялӧн кольччысьӧма батьсьыс. Вӧтӧдіс:

— Батьӧ, тэ видзӧдлы, видзӧдлы. Со пароходыс, со! Ӧні пыр и веськалас пурйыс. Со, аддзан?

— Аддзытӧг ог ов, — бать тапкӧдыштіс писӧ пельпомӧдыс. — А со и чомйӧдз воим.

Чом сулаліс важ моз. Сӧмын ваыс кыськӧ вужля вайӧма да ямигас, быттьӧ нарошнӧ, порог дорас кольӧма. Кӧсъян да он на и пыр. Сэні жӧ орччӧн лясвидзис додь вож пӧв — сьӧдасьӧма, нюйтӧсь. Додь вож пӧвнас Вася батьлы ковмис йӧткыштны вужлясӧ. Сьӧкыдкодь сійӧ вӧлӧма, другӧ! Пырисны посводзас — джодж пӧвъясыс кыдзсюрӧ куйлӧны. Найӧс ытваыс чуктӧдалӧма. Воськовтісны чомйӧ. Кӧтасьлӧм джоджыс косьмытӧм на. Пач горйыс киссьӧма. Ичӧтик ӧшиньысь стеклӧыс зильмунӧма. Сӧмын мыр кодь зумыд джеклы нинӧм абу лоӧма: сулаліс джодж шӧрас.

— Вот, Васюк, мый вӧльнӧй ваыс вӧчӧ, — ляпкыдик вежӧссӧ гӧгӧр видзӧдаліг шыасис батьыс.

— Лёкӧс вӧчӧма да.

— Сійӧ и эм, пиук. И пӧльза вайӧ, и дурны кужлӧ. А морт кӧ босьтчас — и дурӧмсӧ дугӧдас.

Вася матыстчис ӧшинь дорас, видзӧдліс ывлаӧ.

— Морт ӧд вына жӧ. Да ӧд, батьӧ?

— Сідз, ме думысь, — сёрнитігмозыс батьыс видлаліс горсӧ: ёна-ӧ колӧ дзоньтыны? — Мортыд и пач гор тэчас, и ӧшиньсӧ стеклӧалас.

Недыр мысти ая-пиа лэччисны пыжӧ. Йӧткыштчисны берегысь. Ичӧтика катыштісны видзьяс пӧлӧн. Сэсся и сиктлань веськӧдчисны. Пыж нырыс чатӧртчӧма, быттьӧкӧ сылы тшӧтш долыд шлывгыны ойдӧминӧд. Вася пукаліс пыж пыдӧсын, видзӧдлас то катыдӧ, то кывтыдӧ. Кывтыдладорсянь мыйкӧ кутіс тыдавны. Катер, буракӧ.

— Катер кутшӧмкӧ со, — мотор шысӧ венны зілиг горӧдіс Вася, кинас индіс и...

Батьыс видзӧдліс, кыкысь юрнас довкнитіс: катер пӧ. И друг моторыс пыжыслӧн дугдіс уджавны. Артмис: довкнитӧмсьыс быттьӧ.

Ӧтчыд личкыштіс батьыс рычаг вылӧ, мӧдысь — оз кӧсйы уджавны моторыс. Мый нӧ татшӧмыс? Пыж шлывгис-шлывгис, а сэсся и воштіс ӧдсӧ. Батьыс Васялӧн выныштчӧмӧн кокнас бара личкыштіс рычаг вылӧ, мӧдысь, коймӧдысь — мотор чӧв олӧ. Видліс кытсюрӧ разьлыны моторсӧ, но нинӧм сэтшӧмсӧ эз аддзы. Мый и вӧчны? Пӧвтор эськӧ эм пыжас, да курасьӧмнад ылӧ он мун. Либӧ, мӧдарӧ, вывті ылӧ мунан, а берегӧ он во. А катысь катерыс матын нин. Веськӧдлысьыс тыдалӧ весиг. Со и мӧд морт тыдовтчис, петіс катер нырас, кисӧ син дорас вайӧдіс, видзӧдӧ.

— Мездӧй, бур йӧз! — горӧдіс да шапканас кутіс ӧвтчыны батьыс. Таркакылӧм дугдіс. Катерыс чинтіс ӧдсӧ, пыжа вылӧ веськыда локтӧ. Катер нырын сулалысьыс кватитіс багыр, нюжӧдіс сійӧс. Пыж дінӧ сибалігӧн катерыс мичаника шуйгавыв бергӧдчис — пыжыс дзик бокас лоис. Катервывса мортыс крукыштіс багыр йывнас пыжсӧ ӧключина горулӧд, кыскыштіс асланьыс, шуис:

— Кыпӧдчӧй миянӧ, кодъяс ті эмӧсь! — И нюжӧдіс кисӧ Васялы.

Вася кайис катерӧ, рулевӧйыс сійӧс рубкаӧ пыртӧдіс. Батьыс мыччис матрослы якӧрсӧ, кокньыдика чеччыштіс катер бӧжас, трос чукӧр костӧ.

— Кытчӧ туй кутанныд? — юаліс капитан.

— Со пристаньным, — индіс кинас Васялӧн батьыс.

— Ладнӧ, кежалам, — шуис капитан. — Полнӧй! — кинас ӧвтыштӧмӧн горӧдіс сійӧ рубкасалы.

Вася пукаліс рубкаын. Видзӧдлас рулевӧй вылӧ, штурвал-гӧгыль вылӧ, вештылас видзӧдлассӧ шуньгысь ва вылӧ, гортланьыс. Дивӧ тай! Ӧні на пыжын пукаліс — и со катер рубкасянь нин ӧтарӧ-мӧдарӧ видзӧдӧ. А пыжныс катер бӧрся ньӧти кольччытӧг кыскысьӧ. Буксир вылын ӧні сійӧ.

— Кыдзи тэнӧ шуӧны? — юаліс рулевӧйыс.

— Васяӧн.

— Но, тьӧзкаяс тай ми. А ме Василий Степанович, Рочев. Эн кывлы?

— Эг, — Вася сюся видзӧдліс рулевӧйлы синмас, сэсся капуста паса фуражкаас. — Эг кӧ-а.

— Но нинӧм. Эн шогсьы. Мунам тшӧтш миянкӧд Лапъюӧ. Он? Пур эськӧ кылӧдім ӧттшӧтш.

— А ми ӧдва эг кылалӧй, — шуис Вася.

— Верминныд, дерт, — шуис рулевӧйыс. — Ӧні чеччӧдам тіянӧс кытчӧ колӧ, сэсся сиктсьыныд ылӧ онӧ кылалӧй. Сідзи? Вася довкнитіс юрнас да бара видзӧдліс юалысьлы синмас: со пӧ кутшӧмӧсь, вӧлӧм, катервывсаясыс.

— Пурла мунанныд? Уна жӧ кылӧданныд?

— Пароходысь тӧкӧтьӧ этшаджык жӧ, — нюммуніс рулевӧйыс, быттьӧкӧ Васялысь ӧнтая сёрнисӧ кывлӧма. — Мыйтакӧ век нин ва бӧртӧ кыскам.

Сикт горулын, шор вомын, челядь, тыдалӧ, йӧрш вугралӧны. Налань и матыстчис катерыс.

— А со миян керканым, — индіс Вася. — Аддзанныд? Столб тай ӧшинь улас.

— Эсійӧ, лӧз кильчӧаыс? Волам коркӧ.

— Волӧй, волӧй. Миян ӧд батьӧ кузнеч, — ошйысьыштіс Вася.

Кор ая-пиа вӧліны нин берегынӧсь, на дінӧ котӧрӧн локтісны вуграсьысь челядь. Видзӧдӧны катер вылӧ, вежӧгтӧны Васялы.

Катер ылыстчис, бӧрсьыс сӧмын гыяс чеччалӧны, быттьӧ тшӧтш отсасьӧны катерлы. Швачнитісны гыясыд изъя берегӧ, весиг Васяӧс резыштісны. Вася колльӧдӧ синнас катерсӧ. Батьыс пыж бӧжын пукалӧ, моторнас ноксьӧ, ӧтчыд лэптыліс юрсӧ, видзӧдліс катер вылӧ и бара мыйкӧ гартлӧ, мыйкӧ разьӧ. А Вася синсӧ катер вылысь эз вештыв, быттьӧ мыйкӧ зэв донатор колис сэтчӧ.

Збыль, катерыд аслас местаын колӧ жӧ.


Гижӧд
Катер
Жанр: 
Ӧшмӧс: 

lkejrlkelkrgner klrjnelknfrkl ekjnrjkenfrej

1