ЛӦНЬ ВОЙӦ


Дыр вӧтлі дзурыд туй выв кузя,
Зэв лӧнь и мича вой шӧр кад.
Оз унмӧй лок, кӧть ставыс узьӧ,
И гортӧ пырны абу рад.

Сэзь вой.
И тӧлысь сэтшӧм вылын
Лӧз енэж весьтын ӧтнас дзик,
Кыдз ӧні ӧтнам ме туй вылын.
Лӧнь-чӧлӧ вӧйӧма став сикт.

И сӧмын лымйӧд дзуртӧ кок шы,
А сувтан — 
Сэтшӧм шы ни тӧв!
Пель пиын тіньгӧ,
Сувтӧ лов шы.
Ой, кутшӧм гӧгӧр ставыс чӧв!

Чу! Кӧнкӧ кылыштіс ныв серам...
Мый?.. Кажитчис-ӧ, кыліс кӧн?..
Но сӧмын кылӧ сьӧлӧм вӧрӧм,
И гӧгӧр — вемӧдз йиджан лӧнь!

Кыдз дзугны тайӧ лӧньсӧ меным?
И тырмас оз нӧ эськӧ вын...
Кор быттьӧ кынмӧм
Му и енэж,
И быттьӧ тӧлысьыс тшӧтш кын?