НЫВЛЫ ПИСЬМӦ

Гижа тэныд ме, сьӧлӧмшӧр нылӧй,
Тэ эн дивит, мый кывсьӧртас жеб.
Мед ме тэ дорсянь ӧні зэв ылын,
Ассьым мӧвпъясӧс тэсянь ог дзеб.

Гажа сад йӧрын августся рытын
Тэнӧ аддзӧдлі, сьӧлӧмшӧр ныв.
Тайӧ рытсӧ сӧдз асывкӧд йитіс
Тэнад медбӧръя меліа кыв.

Ме ог вунӧд, кыдз рыт кыа кусіг,
Ӧткодь долыдӧн кажитчис рыт.
Сьӧлӧм сотыштіс, шуин кор «мусаӧй»,
Сӧмын окыштны воча эг лысьт.

Уна рыт пом ми тадзикӧн векньӧдлім,
Сӧмын олӧм — кыдз Эжва ю выв.
Регыд лоа ме туй вӧчысь техник,
Тэ — ударник-колхознича ныв.

Сійӧ кадсянь вель уна нин коли,
А со сьӧлӧмын пыр сійӧ би.
Сӧмын кыкысь на воча кыв воліс,
Мыйла вунӧдін, мыйла он гиж?

Ме со радейта важ моз на ӧнӧдз.
Тэ нӧ сэкся моз радейтан он?
Тайӧн помала письмӧӧс тэныд,
Сиа муыс кодь ыджыд поклон.

Гижа тэныд ме кывбуръя кывйӧн,
Тэсянь меным зэв уна оз ков:
Висьтав меным тэ, сьӧлӧмшӧр нылӧй,
Кыдзи комиӧн шусьӧ «любов».