ТЭ МУСӦ ВЫЛЬМӦДІН


Октябрь, кор кыліс тэнад гым,
Сэк важсӧ мустӧм рӧкыс суис,
Йӧз сьӧлӧмъясысь сыліс лым,
И шудлань мӧдіс чужан муӧй.

А ме, Октябрь, сэк эг на-й вӧв,
Но шудсӧ сэк нин меным койин.
Нева ю дорсянь свежӧй тӧв
И татчӧ, Войвылӧ, тшӧтш воис.

Лёк важыс кисӧ эз нин сет:
Ӧд арын кужис чужны тулыс.
Эз сэк мӧй выльлӧн кыа пет,
Код вежис бансӧ дона мулысь?

Со талун грымакылӧ гым,
Кыдз сэки, уна вояс сайын:
Салютлӧн кыпыд, збодер шы
Быд помын кылӧ, дзик быд крайын.

Ме лёккӧд косьын ог ло ляб.
Ми тэкӧд быдтор вермам-венам.
Тэ мусӧ выльмӧдін, Октябрь,—
Пӧсь аттьӧ йӧзсянь таысь тэныд.