ВЫЛЬ КОКНЬӦД


Неважӧн петіс вӧр йылысь выль закон (Леснӧй кодекс). Сійӧ закон сертиыс крестьяналы сетӧны кык десятина вӧр быд мортлы (лунвылын ӧти десятина).

Миян крестьяналӧн войдӧр вӧр эз вӧв. Став вӧрыс казналӧн вӧлі. Стрӧитчигӧн вӧрсӧ лоӧ вӧлі ньӧбны казналысь — босьтны кер билет. Гӧльджык крестьяна билетсӧ ньӧбны оз вӧлі вермыны — нажӧткаыс эз вӧв да. Та вӧсна уналы лоӧ вӧлі гусясьны, билеттӧг керсӧ лэдзны. Леснӧй стража, казялас кӧ, тӧдӧмысь, протоколитӧ керсӧ да судитӧ кералысьсӧ. Вель уна гӧль крестьяналы лоӧ вӧлі билеттӧг кер лэдзӧмысь пукавны чижовкаын да штрап мынтыны.

Сӧвет власьт пыр зілис кокньӧдны олӧмсӧ уджалысь йӧзлысь. Но быдтор лӧсьӧдны друг он вермы: нёль во чӧж лои чорыда воюйтны. Война помасьӧм бӧрын вӧлись позис бурджыка босьтчыны олӧм лӧсьӧдӧмӧ. Босьтчис Сӧвет власьт и вӧр бердӧ: лэдзис вӧр йылысь закон, шуис сетны крестьяналы вӧр.

Ӧні эм вель уна гӧль крестьяна, кодъяс сюрӧмаӧсь судӧ билеттӧг кер лэдзӧмысь. Мукӧдсӧ судитӧма нин да тюрьмаын пукалӧны. Сэтшӧм гӧль крестьянасӧ мездӧм могысь обласьтса суд бердын лӧсьӧдӧма комиссия. Сійӧ чукӧртчыліс апрель 1-й лунӧ, видлаліс ВЦИК-лысь декрет да шуис: гӧль крестьянаӧс, кодъяслӧн семьяас вит душ вылӧ эм сӧмын ӧти вӧв да кык мӧс, а сідз жӧ красноармейскӧй семьяясӧс мездыны билеттӧг кер лэдзӧм вӧсна судитӧмысь, мыжсӧ кӧ вӧчӧма выль закон лэдзтӧдз (кольӧм вося августӧдз), да кольӧм куим во чӧж кӧ абу мӧдысь сюрлӧма тайӧ мыжсьыс.

Удитӧмаӧсь кӧ нин судитны, — пуксьӧдӧмсьыс, штрапсьыс мездӧны народнӧй судъяс. Секвеструйтӧм вӧр гусялӧмысь — оз мездыны.


Гижӧд
Выль кокньӧд
Тема: 
Йӧзӧдан во: 

lkejrlkelkrgner klrjnelknfrkl ekjnrjkenfrej