МЫЙ ШУӦНЫ КОМИ ЙӦЗ

ЛЕНИН КУЛӦМ БӦРЫН


В. И. Ленин кулӧм йылысь юӧр шызьӧдіс коми йӧзӧс. Быдлаын ёна казьтылӧны сійӧс шогсигтырйи. Со мый шуисны январ 22-ӧд лунӧ кӧрткерӧссаяс: «РКП да РКСМ ячейкаяс, профсоюз, вӧлӧсьтса Сӧвет, делегатъяс, допризывникъяс да крестьяна собранньӧ вылын кывзім миян велӧдысь Ленин кувсьӧм йылысь висьталӧм да шуам: Ыджыд шог суис став му вывса уджалысь йӧзӧс. Тайӧ шог кузяыс ми чорыдджыка босьтчам уджавны, пондам ӧтувтчӧмӧн мунны водзӧ Ленинӧн индӧм туй кузя. Нэмыс олас миян сьӧлӧмын да вежӧрын сылӧн велӧдӧмыс, нимыс!»

Мӧд лунас чукӧртчылісны став крестьяна да шуисны: «Кӧрткерӧсса крестьяна чукӧртчылісны да кывзісны став му вывса уджалысь йӧзӧс велӧдысь Ленин кувсьӧм йылысь да шуисны: Ми шогсям революция нуӧдысь кувсьӧм понда, кӧсйысям сылысь заводитӧм уджсӧ нуӧдны водзӧ. Некор оз быр Ленин миян сьӧлӧмысь!»

Позтыкерӧсса крестьяна январ 25-ӧд лунӧ шуисны: «Ог кежӧй Ленинӧн индӧм туй вылысь, огӧ вунӧдӧй некор Ленинлысь уджсӧ».

Мордінса крестьяна Ленинӧс дзебан-гуалан лунӧ, январ 27-ӧд лунӧ, чукӧртчылісны 150 сайӧ морт. Шогпырысь казьтылісны сійӧс да шуисны: «Ми, Мордінса граждана, кывзім миянӧс велӧдысь, мездысь, выль олӧмӧ нуӧдысь Ленин кувсьӧм йылысь висьталӧм да кӧсйысям некор не вунӧдны сылысь бур вӧчӧмсӧ. Ленин ёрт, тэ кувсин, но тэнад уджыд эз кув. Тэнад индӧм туй кузя кутам мунны водзӧ, кытчӧдз оз сетчыны миянлы став му вывса буржуйяс!

Бурсиам тэнад туйӧд водзӧ нуӧдысьяслы!»

Ичӧтик Конша сиктса олысьяс шуӧны: «Коншаса войтыр ёна шогсьӧны Ленин ёрт кувсьӧм кузя да надейтчӧны — сылӧн отсасьысьясыс водзӧ кутасны нуӧдны Ленинӧн заводитӧм уджсӧ, гӧль йӧзӧс озыръяс кипод улысь мездӧмсӧ, гӧль йӧзлысь олӧмсӧ кокньӧдӧм. Ми надейтчам, мый и мукӧд государствоясса уджалысь йӧз миян моз жӧ мездысясны озыръяс кипод улысь, ӧтувтчасны миянкӧд да ӧтув кутасны лӧсьӧдны уджалысь йӧзлысь бур олӧм».


Гижӧд
Мый шуӧны коми йӧз Ленин кулӧм бӧрын
Тема: 
Йӧзӧдан во: 

lkejrlkelkrgner klrjnelknfrkl ekjnrjkenfrej

1