ӦТУВТЧӦМӦН УДЖАЛӦМ


Неважӧн ме аддзысьлі Выльгортса ӧти морткӧд. Сёрни костын сійӧ меным шуӧ: «Ми сизимӧн ӧтувтчим да ньӧбим вартан машина». Вартам пӧ луннас вит-квайт рыныш. Кужысь йӧз вартӧны кызь рынышӧдз. Сетім пӧ машинаыс вылӧ задатки 10 миллион быд морт. Мукӧдсӧ пӧ мынтам вочасӧн. Вартан машинаыслӧн став доныс 555 миллион шайт. Сыктывдінса земельнӧй отдел сетӧ удждон во кежлӧ. Позьӧ надзӧникӧн вештыны.

Машинасӧ бергӧдлӧны кык вӧв. Вартӧны ульнас, рынышӧ шӧтлытӧг. Позьӧ тшӧтш лӧсьӧдны тӧлӧдчан машина, мед вартігмозыс жӧ и тӧлӧдны. Тӧлӧдӧмӧн кӧ, машина бердас колӧ 10 морт.

Водзӧ выльгортсаыд висьталӧ: локті пӧ гортӧ да куті артавны, лоӧ оз барышыс машина босьтӧмсьыс. Арталӧмъяссьыс артмӧма: машинаыслӧн доныс ӧти воӧн и вештыссяс. А ӧти вонад ӧд сійӧ оз жугав, кымын во, колӧкӧ, вартас.

— Ӧтув кӧ лӧсьӧдан ещӧ мукӧд машинаяс, — мыйта удж найӧ кокньӧдасны да йӧзыслысь кадсӧ прӧстмӧдасны. Сійӧ каднас позьӧ видз-му вӧчны, ассьыд овмӧстӧ содтыны, — шуӧ тӧлка мортыд.

— Ӧні ми дзик асланым йӧйлун вӧсна сьӧкыда уджалам, мусӧ люкалам, асьнымӧс нартитам, а век гӧля олам. Кыдзи пӧльяснымлӧн пӧльясыс уджавлӧмаӧсь, ми век на жӧ сідз уджалам, ньӧти ог кокньӧдчӧй.

Мукӧдлаын йӧзыд велӧдчӧмаӧсь, миян дорысь ёна этша уджалӧны (машинаяс уджӧдӧны) да дас пӧв бурджыка олӧны. Сідзжӧ колӧ миянлы велӧдчыны овныыс.

Выльгортсаяс босьтчӧмаӧсь нин. Дыр-ӧ нӧ мукӧдыс узьны кутасны? Оз весь шуны бур йӧзыс: «Ӧтувтчӧмын — вын!»


Гижӧд
Ӧтувтчӧмӧн уджалӧм
Йӧзӧдан во: 

lkejrlkelkrgner klrjnelknfrkl ekjnrjkenfrej

1