КОЛӦ ЧЫШКЫШТНЫ

Неважӧн ме сёрниті ӧти пленысь локтыськӧд. Сійӧ шуӧ: «Ме эг чайт Россияысь татшӧм олӧм. Ми вӧлі чайтам, мися, Россияын власьтсӧ босьтісны уджалысь йӧз, важ начальствоӧс шыбитісны, ыждалысьяс бырисны. Локны кутім гортӧ. Мурашсянь локтігӧн миянлы лои пыравны быд исполкомӧ, военкомӧ. Мый жӧ ми сэтысь казялім? Унджык служащӧйыс весиг оз убӧлитны миянкӧд сёрнитны, мукӧд вӧлӧсьтас суткиӧдз кутасны. Унджык служащӧйыс важ сардырся чиновникъясысь омӧльӧсь. Асьнысӧ зэв вылӧ пуктӧны. Зэв миянлы эз кажитчыны!»

Унаӧн тадзи лябсьывлӧны, да и асьным сэтшӧм служащӧйяссӧ тӧдлывлім. Сӧветскӧй служащӧйяс кутісны пӧрны важ чиновникъясӧ, мукӧд дінас весиг он сибав. Сэсся эмӧсь кодсюрӧ зэв кыв-вора служащӧйяс: кывнаныс зэв уна кӧсйӧны, да уджныс водзӧ оз мун. Локтас мужик карӧ кутшӧмкӧ могӧн, сійӧс котрӧдласны лунтыр ӧти учрежденньӧысь мӧдӧ. Дӧзмас сійӧ да пондас проклинайтны служащӧйяссӧ и Сӧветскӧй власьтсӧ.

Водзӧ кежлӧ служащӧйӧс бӧрйигӧн оз ков видзӧдны лӧсьыда сёрнитӧм вылӧ, колӧ бӧрйыны тӧлкаӧс, уджалысьӧс, уджалысь йӧз дор олысьӧс. Лёка служитысьясӧс, ыждалысьясӧс колӧ чорыдджыка топӧдны, мед казявлас: «Абу пӧ тай важ власьт ӧні вӧлӧма, Сӧвет власьт пӧ тай». Войдӧр найӧс быть вӧлі видз, служащӧйыс оз тырмы да, ӧні локталӧны пленысь, армияысь, на пиысь сюрӧны бур уджалысьяс.

Воссьӧ Коми Республика. Удж уна лоӧ. Уна вежӧра йӧз ковмас. Бӧрйӧй сэки быдлаӧ тӧлка, сяммысь йӧзӧс, коми йӧзлысь олӧмсӧ тӧдысьясӧс, мед миян Республикалӧн уджыс бура кутас мунны.