САЛДАТ
Салдат локтӧ армияысь. Сэсся поп ордӧ пырас, да поп медалас сійӧс, салдаттӧ, казакӧ:
— Вай миянлы медась, казакӧ?
— Медася. Вонас ӧтчыд печиктӧмысь, сы вылӧ ме и ола, вонас ӧтчыд печикта тэныд, поплы, сійӧ и доныс!
Поп рад. Сэсся мыйкӧ мында олыштасны, поп тшӧктас салдатлы мӧсъяс начкыны. Петіс салдат мӧс начкыны. Плешас печиктас мӧскыдлы, и мӧс кулӧ.
— Ого, — гӧтырыдлы, попаддяыдлы, поп шуӧ, — чӧртыд тайӧ и виас, ён тай вӧлӧма!
Сійӧ начкис вит кымын мӧс. И олӧны, олӧны. Во тыри.
— Но, батюшко, он на сет тэ меным казакалӧмсьыд донтӧ?
Мӧдыс шуӧ:
— Кӧсйи да быть сет, лоӧ сетны.
Плеш лӧсьӧдіс. Печиктіс — поп пӧшти шой лои. (Дзик шой абу жӧ-а, эз жӧ кув-а.)
— Ок-о! Тэ тай чорыда и печиктін!
— А ме, другӧ, эг на дзоньнас печикты, омӧлика на печикті.
Да, сэсся поп сійӧ печиктӧмсьыс висьмис, вольпасьын и быдсӧн куйліс.
— Сэсся мӧдысь кӧ печиктас, — поп шуӧ попаддялы, — кулан нин. Вай пышъям тась, нопъяс сӧвтам да.
А салдат быттьӧ узьӧ, ачыс кывзӧ. Ноп сӧвтісны, сэсся мыйкӧ ӧттшӧтш ывлаӧ петалісны. Салдат ас местаас водтӧдіс пес чурка да вевттис, мед быттьӧ узьӧ, ачыс пырис нопъяс, сукар нопъяс дзебсис.
Найӧ кутісны мунны. Мунісны, мунісны, мунісны. Горзыны кутіс салдат:
— Попӧ, попӧ, эн коль менӧ ӧтнамӧн, мый нӧ ме уджала ӧтнамӧн!
— Салдатыд ӧні суас, вай ӧддзӧдам!
Найӧ толькӧ быгзьымӧныс мунісны. Ӧдйӧ и мунісны сэсся. Кутшӧмкӧ вӧр керкаӧ воисны. Вӧр керка дорас ты эм и быдӧн.
— Тані и узям, — попаддяыслы шуӧ попыс.
— Узям!
Ноп пӧрччисны. Пес перйыны мунісны. Салдат нопсьыд петіс да ноп бокӧ пуксис да сукар крутшкӧ-сёйӧ.
— Мый нӧ менӧ колянныд, ме нӧ ӧтнамӧн мый уджала, мый кера? Ӧтнамнад ме нинӧм ог куж керны ни уджавны, тшӧтш колі нуӧдны!
Но поп и шогсьӧ, попаддя и. Салдат быттьӧкӧ сэсся унмовсис, нёровтчис да. Найӧ пондісны шогсьыны:
— Таысь эг и мынӧ. Вай узигкостаыс тыас шыбитам сійӧс!
Найӧ, мудзӧмаӧсь да, унмовсисны. А салдат нопъяс локтіс, да абу мудзӧма, абу унмовсьӧма. Сійӧ поптӧ ас местаас водтӧдіс. Попаддятӧ чуксаліс:
— Вай чеччы, матушка, салдаттӧ шыбитам!
Салдатӧс брун шыбитісны. Эськӧ попаддя и казяліс, мыйӧн шыбитісны, мый сійӧ попыд вӧлӧма да.
Сэсся салдаткӧд и коли попаддя. Сэсся гортаныс бӧр мунісны найӧ. Ӧні олӧны-вылӧны салдат да попаддя, попӧс ваӧ брунгисны-а.
