КЫК ВОК

Кык вок олісны. Ӧти сиктын. И ӧти вокыс муніс карӧ овны. Сэні кутіс уджавны, уна деньга нажӧвитны. Озырмис. Керка вӧчӧдіс, двореч кодь. И чужан сиктас сійӧ весиг синсӧ оз явитлы. А сиктса вокыс уна челядя, да сійӧ гӧля олӧ.

И вот коркӧ-некоркӧ гӧль воклӧн ыджыд пиыс быдмис и висьталӧ:

— Айӧ, вай ме карӧ ветла да, гашкӧ, мыйкӧ нажӧвита жӧ да ог-ӧ кӧть карса водзасьӧм тіянлы вай.

— А мый, ветлы, — шуӧ батьыс.— Менам на сэні кӧнкӧ вок вӧвлі, да оз-ӧ отсав тэныд кыдзикӧ.

А детинка зэв сюсь вӧлі. Вот воас сійӧ карас, дядьсӧ корсяс, аддзас да воас дядьыс ордӧ и шуӧ:

— Ме тэнад племянник, сиктысь локті удж корсьны, да он-ӧ лэдз керкаад олыштны?

А дядьыс думайтӧ: «Мый ме кута гӧль воклысь пиянсӧ на лэдзны» — да и шуӧ:

— Нету, — висьталӧ, — у меня брата в деревне, я городской.

— А менам, — висьталӧ племянникыс, — бать-мамӧ кулісны да, ме керкасӧ ставсӧ вузалі дас тысячаысь, да став деньганас карӧ локті.

— О-о, — висьталӧ дядьыс, — збыль ӧд коркӧ вӧвлі менам вок, да неужели тэ сылӧн пиыс. Но, дона племянникӧ, пӧжалуйста, — висьталӧ, — овмӧдчы менам керкаӧ да ов мыйта колӧ!

Сійӧ деньгасӧ кыдзи кыліс, и кывсӧ, и воксӧ ассьыс помнитны мӧдіс.