ПУГАЧЕВ ВЫЛЭМ СО


Одӥг пол урам кузя турын возэн адями кошке вылэм. Уробоез ӟукыртэ, пичиесь нырокъёстӥ возэз сэзъяськыса лӧбык-лӧбык ӝутъяське. Воз йылын кыӵе ке адями тэк кырӟаса, пе, мынэ.

Вал вылын уиськыса мышказ лыктӥсь солдатъёс сое котыртӥллям.

— Татӥ буш уробоен адями ӧз кошкы-а? — юало, пе.

— Кошкиз, — турын воз йылысь адями верам.

— Уробояз маиз ке ынэн шобыртэмын ӧй вал-а?

— О-о, вал, — со нош ик верам.

— Со ик вылэм, иське, со! Кудпала кошкиз?

— Со пала! — воз йылысь мурт киыныз нюлэс пала возьматэм.

Солдатъёс тыпыр-тапыр гинэ ворттыса кошкиллям.

Турын воз йылысь адями озьы ик азьлань мынэ вылэм но гурт пуме вуылэм солдатъёслэсь берлань берытскемзэс адӟем. Собере одӥг капка азе кожыса, турын возэн ик азбаре пырем. Коркась потэм кузёлэн юрттэмезъя, трос гумыё ыбылӥськон арберизэ турын пӧлысь октыса, коргид йылэ ватӥллям.

— Монэ юазы ке, бакча бертӥ шур дуре васькиз шуэ, — верам та пиосмурт.

Собере юртъер кузёлэсь кышнозэ чуме чортэм но таизлы тазьы верам:

— Татчы кин ке пыриз ке, берен потыса кошкыны кос. «Татын нуны вайыны курадӟись кышномурт вань», шу. Ачид мон котырын пиясь мурт котырын кадь берга.

Со адями валес вылэ выдэм. Кӧт вылаз пичи миндэр поныса, копак шобырскем.

Солдатъёс дыбыр-шалтыр гинэ пыриллям.

— Кытын турын возлэн кузёез?

— О-о-тӥ, бакча бертӥ малы ке но шур дуре васькиз, — юртъер кузё вераз, пе.

— Пугач вылэм со, утчано! — солдатъёс вань юртъерзэ котыртӥллям. Чуме но вуиллям. Нош отын валес вылын адями, пе, кылле, ӝуштэ, котыраз нылкышно берга.

— Ой, татын нуны вайыны курадӟись нылкышно вань, эн пыре, — тэльмыре, пе, кышномурт. Валес вылын кыллись уката ӝуштэ.

Солдатъёс ури-бери потӥллям но, шур дуре васькыса, куакын утчаськыны кутскиллям.

Со куспын чумысь потыса, Пугачев капка азе думыса кельтэм валъёс пӧлысь самой умоез вылэ пуксем, нош кылемзэ урысэн шуккыса лэзем. Аслаз калыкез пӧлы тӧлпери кадь лобем.

Кема ик ветлымтэ, туж уно калыкен берытскем. Ваньзы ик, пе, вал вылын. Соку ик соос шур дурысь куакъёсты котыртӥллям но Пугачевез утчасьёсты ваньзэс ик кутылӥллям.


lkejrlkelkrgner klrjnelknfrkl ekjnrjkenfrej

1