ГӦЛЬ ПЕТРА


Оліс сар. Сарлӧн вӧлі куим ныв. Гӧтырыс вӧлі бара нин нӧбасьӧ — вот-вот кага чужсяс.

Сар муні ягӧ гыч кыйны дай вошис. Лун ветлӧ, мӧд ветлӧ, коймӧд ветлӧ. Ассьыс карсӧ оз аддзы.

Ветлаліс, ветлаліс да друг аддзис: морт локтӧ. Сійӧ сарлысь юалӧ:

— Мый керан?

Сар висьталӧ:

— Воши, карам туйӧс ог аддзы.

— А ме кӧ тэныд, — висьталӧ, — отсала, тэ мый меным сетан?

— А мый ме сета, менам нинӧмыс абу да, — висьталӧ сылы сар.

— А сет сійӧс, мый тэ гортсьыд он тӧд, — висьталӧ мортыс.

Сар сӧгласитчас.

— Со, — висьталӧ мортыс, — кытчӧ вӧлыд видзӧдӧ, сэтчӧ и мун!

Сар муні, кытчӧ вӧлыс видзӧдӧ. Муніс, муніс, и воис карӧ. Гортӧ воис, а саричалӧн пи чужӧма. Вот мый гортысь вӧлі оз тӧд. Сар лэптіс саричаӧс пиыскӧд джуджыд башняӧ вылыс судтаас, овмӧдіс сэтчӧ. А салдатъяслы прикажитіс караулитчыны, мед некоді сэтчӧ эз лок да эз пыр.

Салдатъяс кутісны караулитчыны, кругом сулалӧны, мед писӧ оз нуны. Форточка восьса. Войнас сарича садьмис, пи оз кыв. Видзӧдӧ: потан тыртӧм. Сарича кутіс видны салдатъясӧс. Найӧ висьталӧны:

— Ми некодӧс эг аддзылӧ!

Но, навернӧ, кӧлдун нуис, сылы кӧсйыссьӧма да.

А кар помас оліс гӧль старик. Сылӧн вӧлі пи — шойданник Петра. Старик дорӧ локтіс кутшӧмкӧ морт, корсьӧ том мортӧс казак вылӧ. Висьталӧ:

— Меным пиныдтӧ он сетлӧ некымын во кежлӧ казакавны?

Старик висьталӧ:

— Татшӧм бур морт локтіс миян дорӧ да мыйла ог сетӧ.

Мортыс сетіс стариклы содз тыр зӧлӧта деньга, а писӧ нуӧдіс. Сэсся, кор воисны кӧзяин дорӧ, мортыс висьталӧ:

— Вай, Петра, кольччы татчӧ. Ме муна куим во кежлӧ, тэ тані горт ов. Тані, — висьталӧ, — сизим амбар, квайтсӧ видлы, а сизимӧд амбарсӧ эн восьт.

А Петра горт олӧ. Ставсӧ вӧчӧ, кыдзи тшӧктіс кӧзяин. Коркӧ сэсся и воис кӧзяин:

— Сизимӧд амбартӧ эн видлы?

— Эг.

— Сідзи и колӧ. И водзӧ вылӧ сідзи жӧ ов. Мун, — висьталӧ, — ай-мамыд ордӧ. Доддяв бур вӧв. Куим час срок. Ай-мамыдлы ну зӧлӧта деньга тыра гырнич. Ме, — висьталӧ, — сэсся муна вит во кежлӧ, а тэныд бара горт овны ковмас.

Ай-мам ордӧ воис. Налӧн зэв бур керка. Сэні асланыс магазин. Пӧдса. Некодӧс оз лэдзны. Сійӧ всё равно пырис. Ай-мам узьӧны на. Пырис и кутіс слугаяскӧд сёрнитны. Сэсся старука садьмис, зэв рад лои:

— А, Петенька тай миян воӧма!

Магазинысь быдсӧн ньӧбасисны, пусисны-пӧжасисны. Кутісны гӧститны. Петра мамыслы висьталӧ:

— Ме толькӧ куим час кежлӧ вои. Кӧзяин ӧдйӧ прикажитіс локны, сійӧ сэсся вит во кежлӧ мунӧ.

Старука шуӧ:

— Ог лэдз, ог лэдз гортысь мунны!

А Петра шуӧ:

— Всё равно муна!

И сетіс мамыслы зӧлӧта деньга тыра гырнич. И петіс. А сэні быдсӧн ӧграда. Сійӧ ӧграда вомӧныс чеччис и муні. Воис, а кӧзяин вит во кежлӧ мунны лӧсьӧдчӧ. Петраӧс велӧдӧ. Висьталӧ:

— Эстӧні сизим амбар. Квайт амбарсӧ видлы, а сизимӧдсӧ эн восьты!

— Ладнӧ, ладнӧ, — висьталӧ Петра.

Кӧзяин муніс. А Петра олӧм олӧ. Квайт амбарсӧ восьтывлӧ, а сизимӧдсӧ оз.

А налӧн вӧлі пон. Петра понйӧс вердіс-вердіс и шуис:

— Вай сизимӧдсӧ восьтыла!

Восьтіс, а сэні воронӧй вӧв. Вӧв корӧ:

— Вай менӧ юктӧд!

Петра юктӧдіс, юктӧдіс ваӧн вӧлӧс. Сэсся вӧлыс и висьталӧ:

— Тані эм вына ва и слаб ва. Тэ ю вына васӧ.

Петра юис вына васӧ.

Вӧлыс юалӧ:

— Ӧні тэ мый чувствуйтан?

— Ме, — висьталӧ, — чувствуйта сэтшӧм вын — муас кӧ вуг вӧлі, мусӧ эськӧ бергӧді.

— Унаджык, — висьталӧ вӧлыс, — сюри. Мун ветлы да мӧд бӧчкасьыс этшаник юышт. Сэсся висьталӧ:

— Со сэні эм мӧс стада, а бӧрладорас — зэв ыджыд ӧш. Мун да, выныд кӧ ӧні судзас, ӧшсӧ бӧжӧдыс босьт да кучиксӧ кульышт.

Петра ӧшсӧ босьтіс бӧжӧдыс да сюрӧдзыс и кульыштіс кучиксӧ.

Вӧв бара висьталӧ:

— Менӧ татчӧ коль, а ачыд мун сар ордӧ. Сарлӧн шӧркост нылыс верӧс сайӧ мунӧ, ветлы сэтчӧ.

Петра ӧш кусӧ пасьталіс — сюра и бӧжа. Сар дорӧ воис. Висьталӧны:

— Лешакыс кӧ воис-а!

А пӧвар сёян дасьтӧ. Петра сылы пес пыртлыны отсалӧ, а оз сёрнит.

Аски сарлысь нывсӧ мӧд карӧ нуӧдӧны, ичмоньсӧ. Талун бӧръя лун, бал.

Сар висьталӧ:

— Талун колӧ бурджык ӧбед лӧсьӧдны.

А пӧвар юышталӧ, оз бура пӧжась. Унмовсис. Петра ӧш ку пӧрччис, ачыс заводитіс пӧжасьны-пусьыны. Сэсся эштіс, пызан вылӧ тэчис и вевттис еджыд дӧраӧн. А ачыс петіс садйӧ, сэні узьӧ.

Пӧвар садьмис коркӧ.

— Ой, ой, — висьталӧ пӧвар, — менам на ӧд пусянӧ эз пусьы!

Чеччис сійӧ зэв ӧдйӧ, повзис да. Видзӧдӧ, а пызан вылыс быдсӧн сёян-юанӧн тырӧма.

— Вот, — висьталӧ, — лешакыд отсаліс!

Пыртліс налы став сёян-юансӧ. Найӧ сёйӧны-юӧны и ошкӧны пӧварӧс.

Вот сідзи олісны-вылісны. Коркӧ медічӧт нылыс петіс садйӧ гуляйтны. Нылыс петіс, а Петра узьӧ да ӧш кусьыс джынйыс петӧма. Сар ныв садьмӧдіс сійӧс. Петра зэв ӧдйӧ юрсӧ сюйис ӧш куас и кутісны гуляйтны. Сарича ӧшинь пырыс аддзис найӧс да шуӧ сарлы:

— Видзӧд, нылыд кодкӧд гуляйтӧ!

Сарлы зэв эз ло лӧсьыд сьӧлӧм вылас. Сэсся гуляйтісны, гуляйтісны, да нылыс пырис гортас. Сарича сылы шуӧ:

— Ӧнтая лешакыскӧд гуляйтан?!

Ныв и шуӧ:

— Тіянлы лешак, а меным абу!

Олісны-вылісны дай свадьба кутісны керны. Чойясӧс, зятьясӧс корисны. Сёйны-юны кутісны. Сар сэсся и бӧрддзис:

— Вот, — висьталӧ, — медбӧр нылӧс сета верӧс сайӧ. А ӧтик пи и вӧлі, да сійӧ вошис!

Петра и юалӧ сылысь:

— А оз-ӧ позь сійӧс аддзыны на? Ме, — висьталӧ, — ветла да корся!

Муніс вӧв дорӧ. Вӧв и велӧдӧ сійӧс:

— Менӧ, — висьталӧ, — нуӧд да, воам да, дом поводсӧ айӧлы киас сет, а менӧ сэсся мольӧдышт и менам кучикӧй усяс.

Петра нуӧдіс, сермӧд помсӧ сетіс айлы, а ачыс кутіс мольӧдны-зыравны вӧлӧс. Вӧвлӧн кучикыс уси и лоис том молодеч.

Код тӧдас мыйта найӧ сэсся сэні свадьбуйтісны-пируйтісны. Коркӧ сар кулі, и Петра кутіс сарствуйтны. А сарлысь писӧ кызь вит во кежлӧ кӧлдуйтлісны, да кызь вит во сійӧ амбарын и быдмис. Форточка пырыс и нулӧма сійӧс кӧлдуныс.


Гижӧд
Гӧль Петра
Жанр: 
Гижан кад: 
Гижанін: 
Мойдысь: 
Гижӧдӧ босьтіс: 

lkejrlkelkrgner klrjnelknfrkl ekjnrjkenfrej