ПЕС КЕРАЛЫСЬ СТАРИК
Олісны-вылісны старик гозъя. Налӧн вӧлі куим ныв. Старик пес керавны кайис. Пес кераліс. Куим сывъя чипас вӧчис. Думайтӧ: «Сэсся гортӧ лэчча». Кутіс лэччыны. Туй шӧрӧдзыс воис, вужъя бокысь ош чеччис, висьталӧ:
— Старикӧ, ме тэнӧ сёя!
— Эн сёй, эн сёй, Микайлӧ, ме тэныд медыджыд нылӧс сета.
Ош и лэдзис старикӧс. Старик лэччис гортас и пырис:
— Коді, — висьталӧ, — кокӧс пӧрччас, сылы и сир мешӧк.
Медыджыд нылыс шуӧ:
— Айӧ, ме пӧрчча!
Пӧрччис коксӧ айыслысь. Ӧтилаысь видліс, мӧдлаысь видліс:
— Окма, — висьталӧ, — кольӧма ӧд мешӧкыс, чипас пом вылас пукті дай вунӧма. Кайлы да босьт.
Кайис. Туй шӧрӧдзыс воис, вужъя бокысь ош чеччис. Висьталӧ:
— Айыд ӧд тэнӧ меным кӧсйис.
Ош кутіс нылӧс и нуӧдіс. Керкаас пыртіс. Асылӧ-бурӧ воисны. Ош висьталӧ:
— Ме вӧравны муна, тэ пусьы-пӧжась.
Сетіс сылы куим восьтан, ликтіс^Ликтыны — индыны, петкӧдлыны./^ куим амбар: кык амбарсӧ пӧ восьт, коймӧдсӧ эн. Ош муні, ныв ӧтнас колис. Восьтіс ӧти амбар — сэні быдсяма пӧлӧс сёяныс. Мӧд амбарсӧ восьтіс — сэні быдсяма кӧм-пасьыс. Думайтчӧ: «Мыйла тайӧ коймӧд амбарсӧ эз тшӧкты восьтны?» Коймӧд амбарсӧ восьтіс, а сэні вир вор. Сійӧ вир ворас чуньсӧ тшукӧдліс, и чуньыс коли сэтчӧ. Чышъянсӧ пӧрччис и кисӧ тӧбис, ачыс гортӧ пырис.
Ош локтіс, висьталӧ:
— Нылӧ, вай юр корсь.
— Ог вермы, киӧ вундысис!
— А, тэ тай коймӧд амбарас пыравлӧмыд!
Босьтіс, нывлы юрсӧ кераліс, коймӧд амбарӧ чӧвтіс, вирсӧ ворйӧ кисьтіс.
Коркӧ старик бара пес керавны кайис. Пес кераліс. Куим сывъя чипас вӧчис. Кутіс лэччыны. Туй шӧрас ош бара чеччис вужъя бокысь, висьталӧ:
— Старикӧ, ме тэнӧ сёя!
— Эн сёй, эн сёй, ме тэн шӧркост нылӧс сета.
Ош бара лэдзис старикӧс. Старик лэччис, пырис:
— Коді, — висьталӧ, — кокӧс пӧрччас, сылы и сир мешӧк.
Шӧркост нылыс шыасис:
— Айӧ, ме пӧрчча!
Пӧрччис. Ӧтилаысь видліс, мӧдлаысь:
— Окма, — висьталӧ, — кольӧма ӧд сир мешӧкыс, чипас пом вылас пукті, дай вунӧма. Кайлы да босьт.
Кайис. Туй шӧрас вужъя бокысь ош чеччис:
— Айыд ӧд тэнӧ меным кӧсйис.
Ош нуӧдіс нылӧс, керкаас пыртіс. Асылӧ-бурӧ воисны. Ош висьталӧ:
— Ме вӧравны муна, тэ пусьы-пӧжась.
Бара сетіс сылы куим восьтан, ликтіс куим амбар: кык амбарсӧ пӧ восьт, коймӧдсӧ эн. Но, ош муні, ныв ӧтнас коли. Восьтіс ӧти амбар — сэні быдсяма пӧлӧс сёяныс. Мӧд амбарсӧ восьтіс — сэні быдсяма кӧм-пасьыс. «Мыйла тайӧ коймӧд амбарсӧ эз тшӧкты восьтны?» Коймӧд амбарсӧ восьтіс, а сэні вир вор. Сійӧ вир ворас чуньсӧ тшукӧдліс, и чуньыс коли сэтчӧ. Чышъянсӧ пӧрччис и кисӧ тӧбис, ачыс гортӧ пырис:
Коркӧ ош локтіс, висьталӧ:
— Нылӧ, вай юр корсь!
— Ог вермы, киӧ вундысис!
— А, тэ тай коймӧд амбарас пыравлӧмыд!
Бара босьтіс, нывлы юрсӧ кераліс, коймӧд амбарӧ чӧвтіс, вирсӧ ворйӧ кисьтіс.
Коркӧ старик бара пес керавны кайис. Пес кераліс, кутіс лэччыны, а ош нин караулитӧ. Чеччис да висьталӧ:
— Старикӧ, ме тэнӧ сёя!
— Эн сёй, эн сёй, ме тэн меддзоля нылӧс сета.
Бара ош лэдзис старикӧс. Старик лэччис, пырис:
— Коді кокӧс пӧрччас, сылы и сир мешӧк.
Меддзоля нылыс зырӧдас. (Ӧтнас да мый нӧ сэсся.) Пӧрччис.
— Окма, — висьталӧ, — чипас пом вылас кольсьӧма, кайлы да босьт.
Меддзоля нылыс кайис. Кайис, а ош сійӧс караулитӧ нин, кутіс.
Кутіс да нуӧдіс. Сэсся бара коркӧ ош муні, нывлы восьтанъяс колис, коймӧд амбарсӧ эз тшӧкты восьтыны.
Меддзоля ныв ӧтнас коли. Восьтіс ӧти амбар — сэні быдсяма пӧлӧс сёяныс. Мӧд амбарсӧ восьтіс — быдсяма кӧм-пасьыс. «Мыйла тайӧ коймӧд амбарсӧ оз тшӧкты восьтыны?» Коймӧд амбарсӧ восьтіс — ыджыдджык чойясыс, юрныс янасын. Сэсся сійӧ бӧрд да, бӧрд да. Чойясыс понда бӧрдіс да, бӧрдіс да. Сэсся видзӧдӧ-а, рака лэбӧ:
— Мый нӧ, — висьталӧ, — бӧрдан?
— Кыдзи нӧ ог бӧрд, чойясӧс керавлӧма да.
А ракаыд тӧдӧ вӧлӧм сэтшӧм места, кӧні эм кутшӧмкӧ ва, ловва ли, мый ли, сэтшӧм свойствӧ сылӧн, юрсӧ да тушасӧ кӧ ӧтлаалан да пызйыштан, лемасясны^Лемасьны — ляскысьны, йитчыны, клеитчыны./^, и мортыс ловзяс.
Лэбзьыліс ракаыд, вайис васӧ, юръясныс лемасисны, и ловзисны нывъяс. Сэсся ящикъяс лӧсьӧдас и ящик пытшкӧ чойяссӧ тувъялас.
Сэсся ош воас. Найӧ олыштасны. И меддзоля нылыс коркӧ висьталӧ:
— Ой-ёй, — висьталӧ, — талун ӧд айӧлӧн нимлун-а, кыдзи эськӧ ыстыны кӧть мыйкӧ водзасьӧм^Водзасьӧм — гӧснеч./^.
Ош висьталӧ:
— Лӧсьӧд, ме нуа.
Сэсся медыджыд чойсӧ лӧсьӧдас. Лӧсьӧдас, да ош и нуас. Лэччӧдас да оз нин виччысь-а, понъяс увтӧны да, грым шыбитас кильчӧ вылӧ и котӧрӧн пышъяс ягӧ бӧр. Ай восьтас ящиксӧ, а медыджыд нылыс, ловъя и быдсӧн.
Сэсся шӧркост чойсӧ сідз жӧ мӧдӧдас. Сідз жӧ висьталас:
— Ой-ёй, мамӧлӧн талун нимлуныс-а, колӧ эськӧ водзасьӧм мӧдӧдны.
Сідзи жӧ лэччӧдас ош.
Сэсся и ачыс коркӧ, бара жӧ ящик лӧсьӧдас да, ящик пытшкас пырас, а водзвыв висьталас, наказ сетас:
— Ме лӧсьӧда водзасьӧм, а тэ ну, смотри, эн восьты ящиксӧ: ме керка вылас кая да сэтысянь кута видзӧдны.
Сэсся сійӧ водзвыв керка вевт вылас катас гыр (важӧн ӧд тай ыджыд гыръяс вӧвлӧмаӧсь), гырсӧ вӧччӧдас да пӧсь ва чугунӧн катас. (Мойд ӧд мойд и эм.) Сэсся ачыс ящикас пырас. Ош тшапкас да и нуас. Нуас, мудзас. Пуксяс, кӧсъяс видлыны, а пытшкӧссаыс горӧдас:
— Эн восьты, аддза ӧд!
— Ой, но и синма, гӧптӧ нин пукси-а, аддзӧ ӧд.
Сэсся и нуас, ящик бара кильчӧ вылӧ чӧвтас. Ачыс котӧрӧн бӧр. А старик петӧма кильчӧ вылӧ да горзӧ:
— Зять, нӧк сёйны, зять, блин сёйны!
Старикыс горзӧ, корӧ, а ошкыс толькӧ скач пышйӧ, понъяс увтӧны
Воас ош бӧр, горзӧ:
— Лэччы! Лэччы ли, мый ли сэтысь!
А сэн пасьтӧдӧм-вӧччӧдӧм гыр да мый лэччас, оз. Скӧрмас ош да шуркнитас зорйӧн, чугуныс пӧрӧ, пӧсь ваыс киссяс сы вылӧ, да ош сэтчӧ и сотчас.
