КАНЬ ДА ПЕТУК

Олісны-вылісны кань да петук. Ӧтчыд муніс кань пес керавны. Мунігӧн кань шуис петуклы:

— Тэ бара, Ёма локтас да, эн пет, нуас!

— Ог пет, — шуис сылы петук.

Кань муніс. Муртса мышкуыс бердіс, локтіс Ёма баба, кутіс горзыны:

— Петукӧй, пет жӧ, пет! Мича дзолльӧн дзоллясям, чунькытш пыр котрасям!

Петук шуӧ:

— Ог пет! Кань эз тшӧкты.

Ёма баба мунас. Кань локтас.

— Эн пет?

— Эг, — шуас петук.

Аски бара мунас кань. Бара шуас петуклы:

— Талун бара эн пет. Ёмалӧн талун нимлун, тэнӧ сёясны.

— Ог, — шуӧ петук.

Тӧкӧтьӧ мышкуыс каньлӧн бердіс, Ёма баба бара нин локтіс и кутіс горзыны:

— Петукӧй, пет жӧ, пет! Мича дзолльӧн дзоллясям, чунькытш пыр котрасям.

Петуклы окота лои ворсны и шуис:

— Тайӧ пельсасӧ лэптышт, ме сы улын.

Ёма баба лэптыштіс пельсатӧ, петукӧс кватитіс и нуис. Тайӧ лунас Ёма бабалӧн вӧлі нимлун. Петукӧс и жаритісны.

Кань локтіс:

— Петук, тэ эм-абу?

Некод оз шыась. Муніс Ёма баба ордӧ и кильчӧ вылас сьывны кутіс:

— Петукӧй, петукӧй, мый нин тэ думайтан?

Ёма баба кылас и шуӧ:

— Пиӧ, мун петав, коді сэтшӧм мичаа сьылӧ. Мамыдлӧн нимлун, петук яй — пир.

Пи петас. Кань сійӧс кватитас и виас. Бара кутас сьывны кань. Ёма баба мӧд пиӧс ыстас. Кань сійӧс чабыртас. Тышкасясны да, тышкасясны да. Кань и виас сійӧс. Бара кань кутас сьывны: «Петукӧй, петукӧй, мый нин тэ думайтан?»

Ёма баба ачыс петас. Кань уськӧдчас сы вылӧ. Тышкасясны да, тышкасясны да. Кань и вермас Ёмаӧс. Керкаӧ пырас. Петукӧс быглялас, быглялас — петук и гӧнсявны кутас. Ещӧ быглялас, и петук жбыр лэбзяс сёр вылӧ.

Кань босьтас петукӧс, и мунасны гортас. И ӧні на олӧны-вылӧны.