РУЧ ДА ЧОКЫР

Олісны-вылісны руч да чокыр. Вот коркӧ налӧн няньныс быри да пондісны тшыгъявны. Мый жӧ вӧчны? Найӧ шуисны пудъясьны: код юр вылӧ пуд усьӧ — сійӧс и начкыны. Пудъясисны да пуд уси чокырӧс начкыны.

— Сідзкӧ инӧсь, ручанӧй, — шуӧ сылы чокыр, — ветлы жӧ пан ордӧ пуртла.

Муніс руч пан дорӧ да пондіс сьывны:

Панӧй, бур панӧй,

Вай жӧ меным пурттӧ:

Чокырӧс начкыны,

Менӧ, ручӧс, вердны.

Пан сылы шуӧ:

— Менам ӧд, ручанӧй, пуртӧй ныж и оз туй начкысьнытӧ. Тэ мун ветлы ен ордӧ зудла.

Котӧртіс руч ен ордӧ да пондіс сьывны:

Енмӧй, енманӧй,

Вай жӧ меным зудтӧ:

Панлысь пурт кеслыны,

Чокырӧс начкыны,

Менӧ, ручӧс, вердны.

А ен сылы шуӧ:

— Сета эськӧ, ручанӧй, зудтӧ, но менам ӧд зудйыд вывті сьӧкыд. Ветлы мун тӧлысь ордӧ ӧшла.

Котӧртіс руч тӧлысь ордӧ да пондіс сьывны:

Тӧлысянӧй, тӧлысянӧй,

Вайлы меным ӧштӧ:

Ен зуд кыскыны,

Пан пурт кеслыны,

Чокырӧс начкыны,

Менӧ, ручӧс, вердны.

Тӧлысьыд сылы шуӧ:

— Сета эськӧ, ручанӧй, ӧштӧ, но менам ӧшкыд шонді зон вӧтлытӧг оз мун.

Котӧртіс руч шонді ордӧ да пондіс сьывны:

Шондіанӧй, шондіанӧй,

Вайлы меным зонтӧ:

Тӧлысь ӧш вӧтлыны,

Ен зуд кыскыны,

Пан пурт кеслыны,

Чокырӧс начкыны,

Менӧ, ручӧс, вердны.

Шондіыд сылы шуӧ:

— Сета эськӧ, ручанӧй, но менам ӧд зонмӧй тшыг, кӧч йӧлӧн вердтӧг ӧш вӧтлыны оз мун.

Котӧртіс руч кӧч ордӧ да пондіс сьывны:

Кӧчӧй, кӧчӧй,

Вай жӧ меным йӧвтӧ:

Шонді зонмӧс вердны,

Тӧлысь ӧшкӧс вӧтлыны,

Ен зуд кыскыны,

Пан пурт кеслыны,

Чокырӧс начкыны,

Менӧ, ручӧс, вердны.

Кӧч сылы шуӧ:

— Сета эськӧ, ручанӧй, йӧвтӧ, но менам пӧдӧнчаыс абу да некытчӧ йӧвтӧ лысьтыны. Ветлы мун пипу ордӧ лысьтысян дозла.

Котӧртіс руч пипу дорӧ да пондіс сьывны:

Пипуӧй, пипуанӧй,

Вай жӧ меным дозтӧ:

Кӧч йӧв лысьтыны,

Шонді зонмӧс вердны,

Тӧлысь ӧшкӧс вӧтлыны,

Ен зуд кыскыны,

Пан пурт кеслыны,

Чокырӧс начкыны,

Менӧ, ручӧс, вердны.

Пипу сылы шуӧ:

— Сета эськӧ, ручанӧй, дозтӧ, но дозсӧ перйыны нинӧмӧн. Мун жӧ ветлы мой ордӧ да корлы сылысь пиньсӧ.

Котӧртіс руч мой ордӧ да пондіс сьывны:

Мойӧй, моянӧй,

Вайлы меным пиньтӧ:

Пипу доз перйыны,

Кӧч йӧв лысьтыны,

Шонді зонмӧс вердны,

Тӧлысь ӧшкӧс вӧтлыны,

Ен зуд кыскыны,

Пан пурт кеслыны,

Чокырӧс начкыны,

Менӧ, ручӧс, вердны.

Мой сылы шуӧ:

— Сета эськӧ, ручанӧй, но менсьым пиньтӧ нинӧмӧн кыскыны. Ветлы мун кузнеч ордӧ клещила.

Котӧртіс руч кузнеч ордӧ да пондіс сьывны:

Кузнечӧй, кузнечӧй,

Вайлы меным клещитӧ:

Мой пинь нетшыштны,

Пипу доз перйыны,

Кӧч йӧв лысьтыны,

Шонді зонмӧс вердны,

Тӧлысь ӧшкӧс вӧтлыны,

Ен зуд кыскыны,

Пан пурт кеслыны,

Чокырӧс начкыны,

Менӧ, ручӧс, вердны.

Кузнеч сылы шуӧ:

— Сета эськӧ, ручанӧй, клещитӧ, но менам клещиыс дортӧм на. Мун вод гӧбӧч вылӧ да шойччышт сэні, а ме сэк кості клещи тэныд дора.

Руч водіс гӧбӧч вылӧ, котралӧмысла ёна мудзис да сэтшӧм чорыда унмовсис, мый немтор оз кыв. А кузнечыд сэк петаліс кузнечаӧ, донӧдіс клещисӧ да кыдз тай кватитіс дон клещинас ручӧс кывйӧдыс да нетшыштіс сылысь кывсӧ, а кучиксӧ базар вылын вузаліс.