ЧЕЛЯДЬДЫР

Челядьдыр, тэ ӧд сӧмын и олӧмлӧн мич,
Кыдз нӧ паметяд, сьӧлӧмад тэнӧ он видз...
Кӧть война бӧр, и сьӧкыдыс йӧз вылӧ пуксис.
Кӧть и тшыгъялім ми, вӧлім шудаӧсь сэк.
Йизьӧм гынкӧмыс мамӧлӧн миян эз косьмыв.
Ыджыд чойлы — дас нёль, со нин кыскалӧ кер.
А ми вокӧйкӧд — кагаяс, сэтшӧм на посни.
Ен ув пельӧсын ӧбраз миян ӧшаліс стенын.
А детсадйын, ме помнита, вӧлі сэн Ленин.
Челядь вежӧрӧн сэк нин ме кык думӧн олі:
Дона вӧлі мем Ленин, и Енмысь ме полі.
Уна во нин ас вежӧрӧн му вылас ола.
И кор гортӧ, кӧть гежӧда, век жӧ ме вола.
Пӧрысь мамӧлӧн ӧні на ӧбразыс эм.
И пыр кокньыдджык лолывлӧ таысьсӧ меным.
Гашкӧ, кулігӧн менӧ на прӧститас Ен.
Енмыд Ен на и эм, абу кутшӧмкӧ Ленин.