МАМ


Бандзибъяссьыд алӧй кыа бердіс —
Арлыдыд со квайт дасӧд нин вуджӧ.
Чужӧм вылад парманымлӧн серыс:
Уна вожа пулӧн сэні вуджӧр.

Бӧръя вынӧдз зільлін ныв-пи вӧсна, —
Томысянь ӧд дӧва ним тэд колис.
Мудзӧм синмыд ямӧм ты кодь ӧні,
Кодӧс оз нин юктавны сӧдз ёльяс.

Война кадӧ пыклін тужа-нужа,
Тырмыліс тай сӧткӧмыс и ёрччӧм.
Юрси сіад кынмӧм еджыд пужйыс
Оз нин сывлы медъяр шонді водзын.

Тэысь мича мортыс абу некод.
Чой-вок нимсянь мамлы муӧдз копыр.
Сӧмын муса Рӧдинаӧс тэкӧд
Ӧткодявлӧ том и верстьӧ войтыр.

Эз вӧв кокни тэнад баба рӧкыд, —
Со мый вӧсна ручка вильдӧ кисьым.
Гижны меным тэ йылысь зэв сьӧкыд,
Но не гижны — ещӧ сьӧкыд висьӧм.