ОЛӦМ РЫТЛӦН БИОн и казяв, кыдзи кольӧ олӧм... Нокан-керан мыйкӧ лунысь-лун, Кымын водзӧ, век тай унджык колӧ... Сэсся-й талялӧ нин пӧрысьлун. Век на кӧсъян ыджыда тэ вӧчны, Медым кольны ас йывсьыд бур ним, Олӧмыс мед челядьтӧ эз кӧчав, Медым найӧс эз йир-пазӧд сім... А со орччӧн бара нин тай пӧрис Тэнад тшӧтшъя, бур мывкыда ёрт, Кӧть и эськӧ, кутшӧм на жӧ пӧрысь! — Дзик на эз ков гӧрдӧн эжӧм горт... Сьӧкыд кадыс миян пайӧ вичмис — Томдырнымӧс пазьйис война нӧш, Эгӧ кужӧй асьнымӧс ми видзны Уджаліг и гажӧдчигӧн тшӧтш... А ӧд олӧмыд тай сетсьӧ ӧтчыд — Мӧдысь оз нин волы тайӧ Шуд! — Коліс эськӧ сідзи Сійӧс вӧчны, Медым эз ло сӧмын сьӧд да руд. Коліс эськӧ, медым дырджык ӧзйис Тшӧтш и олӧм Рытлӧн мелі Би, Медым чӧжсьӧм сямсӧ помӧдз вӧзйис Ясыд вежӧр да и кужысь ки; Шогыс медым омӧльджыка личкис — Сэк ӧд ӧти луныс оз и коль! — Медым эськӧ ставыс артмис лючки — Визувтіс мед помӧдз Сӧстӧм Ёль!
