ПЫРА ӦТНАМ АРСЯ ВӦРӦ

Пыра ӧтнам рӧммӧм арся вӧрӧ,
Гӧгӧр сӧстӧм, вичкоын кодь лӧнь,
Зарни корйыс сӧмын муртса вӧрӧ,
Орччӧн дзольгӧ визув юлӧн вӧнь.

Ыркыд сынӧд уна кӧрӧн чӧскыд,
Югыд енэж пыдӧстӧм и лӧз, — 
Ставыс босьтӧ менӧ мелі чӧскӧ,
И вунӧ кар и сэні олысь йӧз.

Вылын-вылын, югыд мелі лӧзас,
Орччӧн шывъялӧны варыш гоз,
Эськӧн меным сэтчань вӧчны лӧсас, — 
Вӧръяс весьтӧд кывтны варыш моз;

Мед не тӧдны олӧмысь став пежсӧ, — 
Кыдзи йӧймӧ горшлун понда мир,
Лёклань Мулысь чужӧмбансӧ вежӧ,
Да кыдз помтӧг киссьӧ мортлӧн вир.

И мед немтор менӧ нин эз дзескӧд,
И мед немторйысь нин ме эг пов,
Медым помтӧм мӧдар туйӧ петтӧдз
Вӧрыс моз жӧ лӧнис мудзӧм лов.