РАЙСА ЯБЛӦГМедводдза мортӧс кор лӧсьӧдӧм енмыс, Бур ногсӧн вӧчӧма ас кодьнас дзик: Медым пӧ вӧлі и мича, и вема, Медым эз ло сійӧ мути кодь дик. Сэсся и, медым нин гажтӧмсӧ веніс, Шудаӧн вӧлі мед кузь нэмъяс чӧж, Ордлысьыс тупыльтас мичаник эньӧс — Кургӧй пӧ ӧтлаын, эн тӧдӧй тӧжд. Овмӧдас кыкнансӧ райыслӧн садйӧ — Югзьӧмӧн югзьӧ быд пельӧсын сэн, Шуа ме веськыда, ньӧти ог падъяв — Сэн весиг абуыс тшӧтш жӧ нин эм! Мича-веж пуяссӧ личкӧны плодъяс, Быдӧнысь лювъялӧ-сӧдзтысьӧ ма, Лэбачыс-дзоридзыс бордйӧдӧ ловтӧ, Вын содтӧ ёльясын ловзьӧдысь ва; Сӧмын на мӧвпыштан пажнайтӧм йылысь — Пӧжасьӧм сьӧла нин мыччӧ коз ув, Анделыс водігад меліа сьылӧ, — Со кӧні олӧмыс — ов да эн кув!.. Сӧмын пӧ тӧдӧй, кӧть лунын, кӧть войын, — Чорыда ӧлӧдіс Вӧчысьыс сэк: Некор пӧ яблӧгсӧ татысь эн сёйӧй, Куш ӧти видлӧмсьыс суас пӧ грек! Яблӧг жӧ татӧні гырысь и мича — Татшӧмсӧ некор эз аддзыв на морт! — Пытшсяньыс югзьӧны шондіа биӧн, Вӧзйӧны му вывсьыс медчӧскыдтор. — Вай жӧ ми чӧскыдсӧ гусьӧник видлам! — Каймӧдлӧ зон ёртсӧ мичаник энь, Ачыс сэк меліа сибӧдчӧ дінас, Сьӧд синмас ыпъялӧ биа-пӧсь кень. Мӧдыс сэн дзикӧдз нин воӧма матӧ — Энь ёртлӧн ӧзйӧмысь ыпйӧ жӧ лов… Сэсся и кодлы нӧ, райын кӧть адын, Кутшӧм нӧ ловъялы чӧскыд оз ков? Сӧмын и кутӧ на Вӧчысьлӧн кайтӧм: «Суӧдас тіянӧс зэв ыджыд грек!» Но и пӧсь синъяс со корӧны матын: «Яблӧгсӧ... Чӧскыдсӧ... Ӧдйӧджык чег!..» Сэсся и енмыслӧн ӧлӧдӧм вуніс — Кыкнансӧ эновтіс падъялан вен, Медыджыд шуд пиас ловныс кор суніс, Горша кор чӧскыдсӧ видлісны сэн. Сӧмын тай ывлаыс йиркнитіс чардӧн — Водзаныс гым лои Вӧчысьыс яр, Мый вынсьыс на вылӧ горзӧ и арзӧ — Пыр жӧ пӧ, урӧсъяс, эновтӧй рай, Мед сэсся-й кок пӧвныд татчӧ эз волы — Горш пӧ да грека тан меным оз ков, Кыдзи пӧ кужанныд, сідзи и олӧй, Асланыд мырсьӧмӧн перйӧй нянь-сов!.. Тадзикӧн войтырыс рай олӧм лотіс, Сьӧрсьыс тшӧтш босьтіс и горшлун, и грек... Мыйта нин аснырыс морт олӧм сотіс, Сыысь ог вермӧй со мынны на век... Ай мортыс лоӧмсьыс мыжалӧ эньсӧ, — Чӧскыд пӧ ковмӧма, пӧтлытӧм син!.. Сӧмын вай со кыдзи помалам венсӧ — Эз кӧ вӧв яблӧг — эг вӧлӧй и ми!
