НИМТЫСЬӦМ


Пода туй кузя сьӧрсьӧн-бӧрсьӧн мунӧны детинкаяс да нывкаяс. Кианыс налӧн сумкаяс. Школаысь разӧдчӧны гортаныс. Кок уланыс лымйыс южакылӧ. Но сійӧ шысӧ вевттьӧ челядьлӧн гораа варовитӧм. Кылӧ:

— Ванька!

— Гришка!

— Зойка!

— Майӧг!

Тадзи ӧта-мӧднысӧ чуксалӧны. Паныд налы локтӧ Михаил Иванович. Школьникъяс бура тӧдӧны сійӧс: олӧма морт, агроном. Унаысь нин воліс школаӧ, сёрнитліс велӧдчысьяскӧд. Челядь кежисны туй бокӧ, сетісны пыдди пуктана олӧма мортлы туй мунны шыльыдінті. Михаил Иванович вочаасис челядькӧд да сувтіс на дінӧ.

— Чолӧм, посни граждана! — шыасис сійӧ. — Варовитанныд? Мыйкӧ тай нӧ ме ӧтарӧ кыла: Ванька, Зойка, Майӧг. Мый сійӧ тіян лоӧ?

— Нимъясным, Михаил Иванович! — гажаа вочавидзис детинка, кодӧс Маегов пыдди шуисны Майӧгӧн.

— А кыдзи тэнад прамӧй нимыд?

— Колька!

— Татшӧм нимъясыд ӧнія кадӧ абуӧсь, — зэв збыльысь шуис олӧма морт.

— Оз-ӧ ков миянлы асьнымӧс ещӧ вичавны? — серӧктіс кодкӧ, а мукӧдъяс быттьӧкӧ тайӧс и виччысьӧмаӧсь, заводитісны тшӧтш гигзьыны. Зонпосни ызӧбтісны-серӧктісны, а Зоя вӧсньыдик гӧлӧсӧн тільсъяліс.

— Ті, колӧкӧ, сералӧй, челядь, — шуис Михаил Иванович. — Менӧ, гӧлиник дӧва пиӧс, школаын велӧдчигӧн Мишкаӧн жӧ шулісны, а миян жӧ классын велӧдчысь купеч пи быдӧнлы вӧлі Лёнечка. А тэ, Коля, мыйла он лӧгась, кор тэнӧ нимтӧны майӧгӧн? Ваня, тэ кӧть ӧні и ичӧт гражданин на, а мыйла шуӧны Ванькаӧн?

Школьникъяс чӧв олісны, зумыша видзӧдлывлісны ӧта-мӧд выланыс.


Гижысь: 
Гижӧд: 
Жанр: 
Ӧшмӧс: 

lkejrlkelkrgner klrjnelknfrkl ekjnrjkenfrej

1