ВЫЛЬ КЕРКА


Сикт весьтӧ павкнитчис сьӧд кымӧр. Кос му вылӧ резыштісны медводдза зэр тусьяс. Дзирдыштіс чардби. Енэжыс воссьыліс-потліс, быттьӧ кузь косаӧн керыштісны биа изйӧ.

Пыр матынджык и матынджык сявкнитлісны чардбилӧн кузь бӧжъясыс.

Чардӧн лыйис сикт помын сулалысь важиник керкаӧ. Сартас пескӧс моз юкыштіс ӧшинь куричсӧ, а недыр мысти керкаысь пуркнитіс сьӧд тшын.

Пӧжар кусӧдны котӧртісны ведраяса да багыръяса йӧз. Челядь медся водзынӧсь. Вайисны ва качайтан машина, коді важӧн нин сулаліс пӧжарнӧй сарайын.

Сӧмын кӧзяйкаыс, Дарья Михайловна Пипунырова, совхозса медбур доярка, эз бергав аслас сотчысь керка дорын: сійӧ шойччис-лечитчис Чёрнӧй море дорын.

— Дарьяыд шогысла ӧні йӧймас, — шуис кодкӧ.

— Со тай и шойччис. Бур, мый кӧлуйсӧ кӧть мый сюрӧ вермим петкӧдны.

— Колӧ жӧ татшӧм пакӧсьтыслы артмыны, — шогсисны нывбабаяс.

Сьӧдасисны, мудзисны кусӧдчысьяс, но Дарьялысь керкасӧ горш билысь сідзи и эз вермыны мырддьыны. Керка пыддиыс коли сӧмын сьӧд труба, сотчӧм керъяс да пӧим чукӧр. Дыр на эз разӧдчавны сиктса войтыр, жалитісны, коді кыдзи кужис, море дорын шойччысь нывбабаӧс.

— Тайӧс кӧ тӧдіс, дерт, Дарьяыд гортсьыс некытчӧ эз мун.

— Тӧдан кӧ, кӧні усян, водзвыв эськӧ идзас вольсалан.

— Ок-ок-ок... Вӧлі керка и эз ло. Оз тай весьшӧрӧ шуны: гусясьысь кӧ пӧ пыралас, керка стенъяссӧ кӧть коляс, а биыд ставсӧ ньылыштас.

Йӧзлысь варовитӧмсӧ торкис Семен Матвеевич, совхозса пастук:

— Эм менам сэтшӧм мӧвп: ӧтвылысь стрӧитны Дарьялы выль керка. Совхоз, ме чайта, отсалас и сиктсӧвет бокӧ оз коль, а сэсся и асьным...

— Дерт жӧ, дерт жӧ... Пикӧ ог воштӧ, ас морт ӧд Дарьюшыс. Кытчӧкӧ ӧд оз мун татысь.

Мӧд луннас выльысь мыччысис шонді. Сьӧд кымӧръяс быттьӧ абу и вӧвлӧмаӧсь.

Сотчӧм керка дорын водз асывсянь да сёр рытӧдз мурзіс бульдозер. Этша сёрнитісны мудз йӧз, но унатор вӧчисны налӧн киясыс. Пӧрысьяс и томъяс, нывъяс и зонъяс — ставӧн ноксисны тані. И челядь отсасисны гырысьяслы ӧта-мӧд вежмӧн. Весиг дзор пӧльяс, кодъяс шоча нин петавлісны гортсьыныс, бергалісны уджалысь войтыр дорын, велӧдісны, индалісны.

Кузьӧсь гожся рытъясыд, унатор удитан вӧчны. Торйӧн нин сэки, кор ставӧн уджалӧны ӧтвыв. Ӧтияс выль сруб лэптӧны, мӧдъяс лӧсасьӧны, коймӧдъяс дасьтӧны ӧшинь кӧсякъяс.

Колины лунъяс... Сикт помын мойдын моз ӧдйӧ кыптіс неыджыд выль керка. Лунӧ бана, картинавывса кодь мича. Кор пач тэчысьяс пуктісны медбӧръя кирпич, ӧдзӧс вевдорӧ кодкӧ велӧдчысьяс пиысь тувъяліс мольыда стружитӧм пӧв да сэтчӧ гижис: «Дарья Михайловналы сиктса олысьяссянь и миянсянь, пионеръяссянь».


Гижӧд: 
Жанр: 
Ӧшмӧс: 

lkejrlkelkrgner klrjnelknfrkl ekjnrjkenfrej

1