КУТШӦМ МИЧАӦСЬ, КУТШӦМ ТОМ-ВЕЖӦСЬ ВӦЛІНЫ РОЗАЯС
Кӧнкӧ, коркӧ, вывті нин важӧн, ме лыддьылі ӧти кывбур. Сійӧ менам регыдӧн вуніс... Но воддза кывъясыс колисны вежӧрӧ:
Кутшӧм мичаӧсь, кутшӧм том-вежӧсь вӧліны розаяс...
Ӧні тӧв; кӧдзыдыс гыӧртіс ӧшинь стеклӧяс; пемыд вежӧсын ломзьӧ ӧтка сись. Ме пукала пельӧсӧ йӧршитчӧмӧн; а юрын помтӧг сизьдысьӧ да сизьдысьӧ:
Кутшӧм мичаӧсь, кутшӧм том-вежӧсь вӧліны розаяс...
И ме ачым ачымӧс аддза карбердса роч керкалӧн ляпкыдик ӧшинь водзысь. Лӧня сылӧ гожся рыт да вуджӧ войӧ, шоныд сынӧдыс ӧвтӧ нинпу дзоридзӧн; а ӧшинь вылын, веськӧдӧм ки вылас мыджсьӧмӧн да юрсӧ пельпомланьыс нёровтӧмӧн, пукалӧ ныв — чӧла да азыма видзӧдӧ енэжӧ, быттьӧ кыйӧдӧ медводдза кодзувъяслысь петӧмсӧ. Кутшӧм эскана-кыпӧдысь мӧвпӧ вӧйтчӧм синъясыс, кутшӧм лӧсьыдіника воссьыштӧмаӧсь быттьӧ юавны кӧсйысь вом доръясыс, кутшӧм шыльыда лолалӧ дзикӧдзсӧ сӧвмытӧм на, нинӧмӧн на шызьӧдтӧм морӧсыс, кутшӧм сӧстӧм да нэр том чужӧмыс! Ме некыдз ог лысьт шыасьны сы дінӧ — но кутшӧм сійӧ дона меным, кутшӧма пессьӧ менам сьӧлӧмӧй!
Кутшӧм мичаӧсь, кутшӧм том-вежӧсь вӧліны розаяс...
А вежӧсын пыр пемыдджык и пемыдджык... Гармӧм сись тричкӧдчӧ, йӧктысь вуджӧръяс нӧйтчӧны пӧтӧлӧкын, ывлаын дзуртӧ да скӧралӧ кӧдзыд — и ме быттьӧ кыла пӧрысьлысь гажтӧма шӧпкӧм...
Кутшӧм мичаӧсь, кутшӧм том-вежӧсь вӧліны розаяс...
Ме водзӧ сувтӧны мукӧд мыгӧръяс... Кылӧ сиктын семьялӧн олӧмысь гажа шум. Кык еджгов юр, ӧта-мӧд дінаныс нёровтчӧмӧн, вильыша видзӧдӧны ме вылӧ югыд синъясӧн, алӧй бан бокъясныс тірзьыштӧны кутана серамысь, сойясныс меліа кысьӧмаӧсь, ӧта-мӧд вежмӧныс юргӧны том, бур гӧлӧсъяс; а неуна ылынджык, пелькӧдӧм вежӧслӧн пыдіынджык, мӧд, тшӧтш жӧ том кияс, чуньяснас дзугсиг-сорласигтыр, котралӧны важиник пианинолӧн клавишъясӧд — и Ланнеровскӧй вальс оз вермы вевттьыны важысь-важ самӧварлысь кургӧмсӧ...
Кутшӧм мичаӧсь, кутшӧм том-вежӧсь вӧліны розаяс...
Сисьлӧн биыс чусмӧ да кусӧ... Коді сэні кызӧ сэтшӧма киргӧмӧн да пӧдӧмӧн? Кӧлач моз чикыльтчӧмӧн менам кок дінӧ топӧдчӧ сырмыштысь пон, менам ӧтка ёртӧй... Меным кӧдзыд... Ме кынма... И ставыс найӧ кувсисны... кувсисны...
Кутшӧм мичаӧсь, кутшӧм том-вежӧсь вӧліны розаяс...
