ТШАКА ШЫДЫвла кӧдзыд бӧрын узьӧ Паччӧр вылын ичӧт Вась: Исласигӧн ёна мудзис — Шоныдінад оз ков пась. Сэсся мый нӧ тайӧ лои? — Лои быттьӧ гожӧм шӧр! Васьлӧн чиктылӧ сэн лолыс — Синмыс водзын шоныд вӧр! Еджыд яла кокыс улын, Лыскӧн шувгӧ, кышкӧ кор, Лэбач сьылӧ пуяс вылын, Матын дзольгӧ варов шор. Сэсся еджыд яла письыс Быйкнитіс тай дона гоб! — Васьӧс быттьӧ биа висьӧм Муртса вемӧдзыс эз сот. Сэсся-й мукӧд гоблы инмӧ Видзӧдласнас миян зон, — Васьным миян зэв сюсь синма, Тшӧтш и кок вынйӧрнас ён. — Косьтам тшаксӧ тӧвбыд кежлӧ! — Ошкӧ Васьӧс гӧрдов ур. — Тэа-меа бура вежлам Кӧдзыд дырйи сёян нур... Ывла кӧдзыд бӧрын узьӧ Паччӧр вылын ичӧт Вась. Сӧмын мыйла нӧ сідз гусьӧн Гожся вӧрӧ лэбӧм тась? Миян зонка восьтіс синсӧ, — Ёна шоналӧма мыш... Ывла вылын турӧб синсьӧ... Мамыс пуӧ тшака шыд! Сылӧн кӧрӧн керка ойдӧм, Сыысь югзьӧм Васьлӧн ун, Чӧскыд кӧрыс вӧтнас мойдӧ, Тӧлын мыччӧ гожся лун!
