ЙИРКАП

Йиркап вӧлі нимыс. Сійӧ вӧлӧм прӧмышляйтӧ. Сэсся вӧлӧм понйыс пожӧм йылысь ур пыдди увтӧ. А урыс абу пӧ пуас. Ӧтик лун, мӧд лун бара увтӧ. Ур пуас абу. Бара сійӧ сідз кольӧ мӧд лун. И коймӧд лун петны кутіс, бара увтӧ пон.

Йиркап мунас да, пусӧ тышкыштас чернад. Кырссяс... Сэсся сійӧ и арталӧ, мыйсӧ тась ме и вӧча. Сэсся керыштас, и вир петӧ пусьыс. Ме пӧ лызь татысь вӧча. Лызь сійӧ вӧчас. Лызь ачыс и нуӧ, кытчӧ арталӧ, сэтчӧ нуӧ. Толькӧ лызь кӧмалігас шапкасӧ лызь вылас пуктас, мед оз мун. Мыйӧн шапка босьтіс, лызь лыйны бытьтӧ мунны пондас.

Сэсся сылӧн некутшӧм звер эз мынлы сыысь — кӧр кӧть, рысь кӧть, мый аддзис, сійӧ и кыйис. Чери кыйны ветліс Сім дорӧдз (Сім ты — тасянь 300 верст). Пач ломтысигӧн мунӧ, пач ваймигӧн локтас бӧр.

Выйим кӧлдунича. Сыкӧд заклад вартасны: комын кӧр пӧ выйим, тэ пӧ эськӧ комынсӧ регыд кыян, да комын ӧтикӧдыс лӧз кыса, сійӧс он вермы.

Кыйны кӧртӧ пондас Йиркап. Комын кӧртӧ регыд и кыяс Йиркапыд. И комын ӧтикӧдыд и оз сюр и дыр. Вӧтчас и, вӧтчас и, бӧрти суас жӧ. Сэсся и суас да — катшаӧ пӧртчысяс кӧрыд, сэсся и лэбны пондас. Йиркап беддьӧн кучкас, бордйыд и чегӧ, лэбзьыны оз вермы. Кӧлдунича ассьыс нывсӧ кӧрад пӧртас. Йиркапыд нывсӧ виис, катша — кӧр пыдди.

Йиркап няр йи вывті шульскӧбтас, вуджас. Мӧд ёма вӧлӧма. Ёма шуӧ тьӧткаыдлы (Йиркапыслӧн — К. Ж.): сійӧ пӧ зэв кокньыд, а вӧйӧ, колӧ пӧ сьӧктӧдны.

Нямӧд мыськалан ванас (винаӧн — К. Ж.) юкталас Йиркапсӧ, петалас, мед сьӧктӧ. Сэсся и сьӧкыд лоӧ. Сім дорад сійӧ бара вуджны пондас, черила мунны. Сьӧктӧ да, ӧти лызь пӧлыс юас и пырас, чег йиыс да, мӧд лызь пӧлыс кокнас нетшыштчас, лызьыс мыръяс пырас, тушаыд вӧйӧ ваас.