МОГЫС ТОМ ВЕЛӦДЧӦМ ЙӦЗЛӦН

 

Посни йӧз мынтӧдчӧны гырысь йӧз гыж улысь. Ещӧ вит во сайын на роч буржуйяс босьтісны асланыс чорыд кабыр улӧ коми йӧзӧс и сетісны аслыныс буржуйскӧй кыв — вины коми йӧзӧс, бырӧдны сійӧс му вылысь, рочӧ пӧртны.

Кага дырсяньыс коми йӧз сюрины мукӧд йӧз улӧ: Ыджыд, политически ён йӧз ёна ӧтдортісны, нартитісны коми йӧзӧс. Тайӧ нартитӧмыслы коми йӧз эз вермыны водзсасьны и кутісны надзӧникӧн бырны-вошны. Виччысисны нин сэтшӧм кад, кор сылысь нимсӧ дзикӧдз киритасны. Сьылісны, йӧктісны, нимкодясисны роч буржуйяс.

Гӧгӧрвоысь коми йӧз зэв шогпырысь видзӧдісны коми войтыр бырӧм вылӧ.

Но эз ло роч буржуйяс арталӧм серти. Октябрскӧй революция лямӧдіс буржуйясӧс. Ловзис правда Коми муын — югыд зэв, мича зэв!

Сарскӧй политикъяс бырӧдісны (рочӧ пӧртісны) коми йӧзӧс, медъёна школа пыр. Школаын челядьӧс велӧдісны сідз, мед эськӧ найӧ нинӧмӧ пуктасны (презирайтасны) коми йӧзӧс, коми кыв, Коми му. Ӧні лоӧ выль, справедливӧй школа, кӧні кутасны велӧдны комиӧн.

Важӧн кутшӧмкӧ ичӧтик чиновник, писар нырсӧ вылӧ лэптӧма да чегъялӧ рочӧн, яндысьӧ коми кыв шуны. Ӧні коми кыв лоӧ почётнӧй местаын — школаын, мукӧд учреждениеясын. Комияс, дерт, кутасны и роч кыв велӧдны, но и роч велӧдчысьяс, Коми муын олысьяс, кутасны велӧдны коми кыв. Сідзи тшӧктӧ декрет.

Чепъяс орины. Паськыд горша буржуй чукӧр эз вермы ньылыштны ичӧтик коми войтырӧс... Но уналаті коми йӧзлысь сьӧлӧмсӧ дойдаліс.

Коді бурдӧдас дойяссӧ, коді кок вылас сувтӧдас, коді лӧсьӧдас, индас туйсӧ коми йӧзлы садьмыны, чеччыны? Тайӧ могыс том велӧдчӧм йӧзлӧн, кодъяслы эз на удит вуджны рочӧ пӧртан романовскӧй политикаыс.

Гижысь: 
Гижӧд
Могыс том велӧдчӧм йӧзлӧн
Тема: 
Йӧзӧдан во: 

lkejrlkelkrgner klrjnelknfrkl ekjnrjkenfrej

1